इतिहास अभ्यासक इंद्रजीत सावंत यांना धमकी देणे, तसेच छत्रपती शिवरायांबद्दल आक्षेपार्ह विधान केल्यामुळे प्रशांत कोरटकर मोठ्या प्रमाणात अडचणीत सापडले होते. आपल्याला अटकेपासून संरक्षण मिळावे म्हणून त्याने न्यायालयात अर्ज केला होता. यावर आज सुनावणी पार पडली. या सुनावणीत कोल्हापूर जिल्हा सत्र न्यायालयाने कोरटकर याचा जामीन अर्ज फेटाळला आहे. त्यामुळे आता त्याला कोणत्याही क्षणी अटक होण्याची शक्यता आहे.
इंद्रजित सावंत धमकी प्रकरणी CDR मधून प्रशांत कोरटकरनेच आपल्या मोबाईलवरून इंद्रजित सावंत यांना धमकी दिल्याचा पुरावा पोलिसांच्या हाती लागलाय. यामधून प्रशांत कोरटकरने फोनवरून इंद्रजित सावंत यांना फोन केल्याचं स्पष्ट झालाय. तसेच धमकी देताना त्याने त्याचा आवाज बदलल्याचा दावा केला गेला होता. परंतु, पोलिसांकडून हा दावा फेटाळण्यात आला. यानंतर प्रशांत कोरटकर फरार झाला.
यानंतर शांत कोरटकरवर भारतीय न्यायसंहितेच्या कलम 151 (शांतता भंग करणे), कलम 196 ( खोटी माहिती देणे ), कलम 299 (मृत्यू घडवून आणण्याच्या उद्देशाने कृत्य करणे), कलम 302 (खून करणाऱ्या व्यक्तीला मृत्युदंड किंवा जन्मठेपेची शिक्षा होऊ शकते), कलम 352 (गंभीर चिथावणी देण्याशिवाय प्राणघातक हल्ला करणे किंवा गुन्हेगारी बळाचा वापर करणे) या कलमांतर्गत गुन्हा दाखल करण्यात आला.
नागपूर पोलिसांकडून कोरटकरचा शोध सुरु
इतिहास संशोधक इंद्रजित सावंत यांची फॉरेन्सिक विभागाकडून तब्बल 7 तास चौकशी करून माहिती घेण्यात आली. कोल्हापूर शहरातील जुना राजवाडा पोलीस ठाण्यात फॉरेन्सिक विभागाकडून ही माहिती घेण्यात आली. प्रशांत कोरटकर याने छत्रपती शिवाजी महाराजांच्या बद्दल आक्षेपार्य विधान करून इंद्रजित सावंत यांना जीवे मारण्याची धमकी दिली होती.
यानंतर प्रशांत कोरटकरच्या विरोधात जुना राजवाडा पोलीस स्टेशनमध्ये गुन्हा नोंद करण्यात आला होता. सध्या कोल्हापूर पोलिसांचे एक पथक नागपूर मध्ये प्रशांत कोरटकर याचा शोध घेत आहे. मात्र अद्याप तो फरार असून पोलिसांच्या हाती लागलेला नाही.
