Prashant Kishor : जनसुराज पक्षाचे संस्थापक प्रशांत किशोर (Prashant Kishor) यांनी रविवारी स्वत: पोटनिवडणूक लढवणार असल्याची घोषणा केली. पोटनिवडणुकीच्या रिंगणात उडी घेत त्यांनी भाजपविरोधात दंड थोपटले. भाजपच्या नेतृत्वाखालील एनडीएची सत्ता असणाऱ्या बिहारच्या बांकीपूर विधानसभा मतदारसंघात ३० जुलैला पोटनिवडणूक होईल.

राज्यसभा खासदार बनल्याने भाजपचे राष्ट्रीय अध्यक्ष नितीन नबीन यांनी आमदारकीचा राजीनामा दिला. त्यामुळे बांकीपूर मतदारसंघात पोटनिवडणूक होत आहे. आता उमेदवार बनून किशोर (Prashant Kishor) त्या पोटनिवडणुकीला सामोरे जाणार आहेत. संबंधित निर्णयाची माहिती किशोर यांनीच पत्रकार परिषदेत दिली. बांकीपूरमधील पोटनिवडणूक राज्य सरकारच्या लोकप्रियतेची चाचपणी करणारे सार्वमत ठरेल.

पोटनिवडणुकीत भाजपचा विजय झाल्यास राज्य सरकारला जनतेचा पाठिंबा असल्याचे मी मान्य करेन. मात्र, आमचा विजय झाल्यास सत्ताधाऱ्यांनी (Prashant Kishor) जनतेचा संदेश काय ते समजून घ्यावे. बांकीपूरमधील मतदारांकडे बिहारमधील सर्वांत शिक्षित जनता म्हणून पाहिले जाते. त्यांनी चांगल्या हेतूने मतदान करावे. माझ्यावर विश्‍वास असेल; तर मला मतदान करावे.

माझ्या पक्षाचा मी एकमेव आमदार ठरलो तरी विधानसभेतील इतर २४२ आमदारांपेक्षा सरस ठरेन, अशी भूमिका किशोर यांनी मांडली. भाजपचे नेते सम्राट चौधरी जनादेशाविना बिहारचे मुख्यमंत्री बनले. राज्यात मागील वर्षी विधानसभा निवडणूक झाली. त्या निवडणुकीत एनडीएने जेडीयूचे अध्यक्ष नितीश कुमार यांना चेहरा बनवले होते, याकडे त्यांनी लक्ष वेधले.

बांकीपूर मतदारसंघ भाजपचा बालेकिल्ला मानला जातो. आता तिथून पोटनिवडणुकीच्या रिंगणात उडी घेऊन किशोर यांनी भाजपला थेट आव्हान दिले आहे. किशोर यांच्या पक्षाने अतिशय ताकदीने मागील वर्षीची विधानसभा निवडणूक लढवली. मात्र, तो पक्ष एकही जागा जिंकू शकला नाही. त्या पीछेहाटीचा शिक्का पुसण्यासाठी स्वत: किशोर मैदानात उतरणार आहेत. मागील वर्षीची निवडणूक त्यांनी उमेदवार म्हणून लढवली नव्हती.