Prashant Kishor : जनसुराज पक्षाचे संस्थापक प्रशांत किशोर (Prashant Kishor) यांना अनपेक्षित स्वरूपाची साथ मिळाली. पोटनिवडणुकीसाठी सज्ज झालेल्या किशोर यांच्या पारड्यात तृणमूल कॉंग्रेसचे खासदार आणि ज्येष्ठ अभिनेते शत्रुघ्न सिन्हा यांनी वजन टाकले. सिन्हा यांनी बांकीपूरच्या जनतेला किशोर यांना पाठिंबा देण्याचे आवाहन केले.

भाजपचे राष्ट्रीय अध्यक्ष नितीन नबीन यांनी राज्यसभेवर निवड निश्‍चित झाल्याने आमदारकीचा राजीनामा दिला. त्यामुळे बिहार विधानसभेची बांकीपूर जागा रिक्त झाली. त्या मतदारसंघात ३० जुलैला पोटनिवडणूक होत आहे.

ती पोटनिवडणूक उमेदवार म्हणून लढवण्याची घोषणा किशोर यांनी केली आहे. त्यामुळे भाजपचा बालेकिल्ला मानल्या जाणाऱ्या बांकीपूरमधील पोटनिवडणूक मोठ्या चर्चेचा विषय बनली आहे.

अशात सिन्हा यांनी किशोर यांच्या पाठीशी उभे राहत मतदारांना साद घातली आहे. सिन्हा यांनी पोटनिवडणूक लढवण्याच्या किशोर यांच्या घोषणेचा उल्लेख बिहारमधील राजकीय धमाका अशा शब्दांत केला. बिहारी बाबू असल्याने मला किशोर यांच्याविषयीची बातमी राजकीयदृष्ट्या अतिशय रंजक वाटते.

सर्वांत लायक, दूरदर्शी, बुद्धिजीवी, सर्वसामान्यांचा नेता असणारे किशोर म्हणजे प्रशंसनीय, सर्वांधिक चर्चेत असणारे व्यक्तिमत्व आहे. त्यांनी अखेर स्वत: निवडणुकीच्या रिंगणात उडी घेतली आहे. त्यांना जनतेने आणि विशेषत: तरूणाईने जात, धर्म आणि पक्षभेद विसरून पाठिंबा द्यावा, असे साकडे सिन्हा यांनी सोशल मीडियावरून घातले.