Prashant Jagtap – स्थायी समितीचे अध्यक्ष श्रीनाथ भिमाले यांनी सादर केलेल्या अंदाजपत्रकात विरोधी पक्षातील सदस्यांच्या प्रभागातील कामांसाठी अत्यल्प निधी मिळाला आहे. काँग्रेसचे नगरसेवक माजी महापौर प्रशांत जगताप यांनी याबाबत सभागृहात आवाज उठवला, तसेच भिमाले यांची भेट घेऊन या सदस्यांना अधिकचा निधी द्यावा, अशी विनंती केली. भिमाले यांनीही ही मागणी मान्य केली. प्रिंटिंग मिस्टेक असेल, तर दुरुस्त करा, खुनशी राजकारण करू नका, असे जगताप म्हणाले. भिमाले यांनी सादर केलेल्या अंदाजपत्रकात काँग्रेसच्या काही नगरसेवकांना अत्यल्प निधी मिळाला आहे. शहराचा सर्वांगीण विकास करताना भेदाभेद करू नये. याचा परिणाम थेट नागरी सेवांवर होतो. याचा विचार करावा, असे आवाहन जगताप यांनी भाषणातून केले. त्यांनी या सदस्यांसह भिमाले यांची भेट घेऊन तरतूद उपलब्ध करून देण्याची विनंती केली. भिमाले यांनी निधी देण्याचे आश्वासन दिले. पीएमपीएमएल ही ठेकेदाराला पोसणारी संस्था झाली आहे. अंदाजपत्रकातील अनेक प्रकल्प हे आधीच्या अध्यक्षांनी मांडलेले आहेत. तुमचे प्रकल्प यात यायला हवे आहेत. शहराची वाढ वेगाने होत आहे, २०४७ पर्यंत शहराची लोकसंख्या दोन कोटींंच्या घरात जाईल. मुंबईत ८७ उड्डाण पूल केले आहेत, त्याच धर्तीवर पुण्यातही उड्डाण पूल, ग्रेड सेप्रेटर झाले पाहिजेत, असे जगताप म्हणाले. वाढत्या लोकसंख्येबरोबर पाण्याचीही मागणी वाढणार आहे. आता एकही धरण बांधता येणार नाही, तेवढी जागाही नाही. मुंबईत कोकणातून पाणी आणले जात आहे. इथेही ती व्यवस्था करावी लागणार आहे. जायका, स्मार्ट सिटी अशा प्रकल्पांकडून शहराला काय मिळाले याचे चिंतन करा, शहराला उपयोगी पडणारे प्रकल्प आणा. आम्ही त्याला नक्कीच पाठिंबा देऊ, असेही जगताप यांनी नमूद केले.
