Prajakta Mali । Suresh Dhas : अभिनेत्री प्राजक्ता माळीबद्दल वादग्रस्त वक्तव्य केल्याप्रकरणी भाजपचे आमदार सुरेश धस यांनी दिलगिरी व्यक्त केल्यानंतर आता प्राजक्ता माळीनेही आपली प्रतिक्रिया व्यक्त केली आहे. सुरेश धस यांच्यावर आपल कुठलीही कारवाई करणार नसल्याचे अभिनेत्रीने म्हंटले आहे. प्राजक्ताचा एक व्हिडिओ सोशल मीडियावर व्हायरल होत असून, यामध्ये तिने सुरेश धस यांच्याबद्दलही चांगले उद्गार काढले आहेत. अभिनेत्री व्हिडिओत म्हणाली की, “आमदार सुरेश धस यांनी अत्यंत मोठ्या मनाने घडलेल्या घटनेबाबत दिलगिरी व्यक्त केली, त्याबद्दल मी त्यांचेही आभार मानते. दादा, तुम्ही शिवरायांच्या विचारांचे पाईक आहात हे दाखवून दिलंय. छत्रपतींची भूमिका महिलांच्या सन्मानासाठी किती कठोर होती, हे आपण सगळे जाणतो. ही छत्रपतींची भूमी आहे, आणि इथे छत्रपतींचे विचार पुढे चालवले जातात हेच तुम्ही ह्या कृतीतून दाखवून दिलंय. असं ती म्हणाली. आमदार सुरेश धस यांनी माफी मागितल्याने मी त्यांच्यावर कोणतीही कायदेशीर कारवाई करणार नाही. माझ्या बाजूने या संपूर्ण प्रकरणावर पडदा टाकते. आम्ही व्यक्त झालो की आमच्यावर टोळ धाड पडते, असे म्हणत प्राजक्ताने खंतही व्यक्त केली आहे. कुठलंही आंदोलन, कुठलाही मोहीम, कुठलाही मोर्चा डायव्हर्ट करण्याचा माझा हेतू नव्हता. आमदार धस हे बोलले नसते तर मलाही अशाप्रकारे हे काही करायची गरज नव्हती, असे स्पष्टीकरण प्राजक्ता माळीने दिले आहेत. अभिनेत्री प्राजक्ता माळी आणि आमदार सुरेश धस यांच्यातील वाद नेमका काय? मस्साजोग येथील सरपंच संतोष देशमुख यांच्या खून प्रकरणात सुरेश धस यांनी पोलिस अधीक्षकांची भेट घेतल्यानंतर माध्यमांशी संवाद साधताना प्राजक्ता माळी, रश्मिका मंदाना यांची नावे घेत, याही परळीत येतात आणि एखाद्याला चित्रपट काढायचा असेल तर त्यांनी परळी पॅटर्न पाहावा, असे वक्तव्य केले होते. यानंतर प्राजक्ता माळी यांनी धस यांचा निषेध करून त्यांच्या माफीनाम्याची मागणी केली होती. मी माफी मागणार नाही, अशी भूमिका धस यांनी आधी घेतली होती. मात्र, प्राजक्ता माळी यांनी रविवारी मुख्यमंत्री देवेंद्र फडणवीस यांची भेट घेतल्यानंतर दुसऱ्याच दिवशी धस यांनी केलेल्या वक्तव्याबद्दल दिलगिरी व्यक्त केली. प्राजक्ताताई माळीबाबत माझ्या स्टेटमेंटचा गैरअर्थ निघाला आहे. मला त्यांचा अपमान करायचा नव्हता किंवा त्यांच्या चारित्र्याबाबतीत तर बोलण्याचा विषय नव्हता. मी प्राजक्ताताई सह सर्व स्त्रियांबाबत आदर बाळगतो. माझ्या वक्तव्याचा गैरअर्थ निघाल्याने, त्यांचे किंवा अन्य कोणत्याही स्त्रीचे मन जर दुखावले असेल तर मी प्रामाणिकपणे दिलगिरी व्यक्त करतो, असे सुरेश धस यांनी म्हंटलं होते.
