शिरूर : वाढदिवसाचा आनंद केक कापून साजरा करण्याऐवजी वृक्ष भेट देऊन पर्यावरण संवर्धनाचा संदेश देण्याचा स्तुत्य उपक्रम घोडनदी बार असोसिएशनने सुरू केला आहे. बार असोसिएशनचे नवनिर्वाचित उपाध्यक्ष ॲड. गणेश वामनराव कळसकर (तांदळी) यांच्या संकल्पनेतून हा उपक्रम सुरू झाला असून, त्याचे वकील संघटनेसह विविध सामाजिक संघटनांकडून कौतुक होत आहे.

बार असोसिएशनचे विद्यमान सदस्य ॲड. भरत खाडे यांचा आज (दि. १०) वाढदिवस होता. यानिमित्त ॲड. गणेश कळसकर यांनी त्यांना केशर आंब्याचे रोप भेट देऊन वाढदिवस साजरा केला. या वेळी बार असोसिएशनचे अध्यक्ष ॲड. विकास फडतरे यांनी ॲड. खाडे यांना वाढदिवसाच्या शुभेच्छा देत पुढील वाटचालीसाठी सदिच्छा व्यक्त केल्या.

यापुढे बार असोसिएशनमधील सर्व वकिलांचे वाढदिवस केक न कापता वृक्षभेट देऊन साजरे केले जातील, असे नवनिर्वाचित अध्यक्ष ॲड. फडतरे यांनी सांगितले. वाढदिवसाच्या निमित्ताने वृक्ष भेट देऊन त्याचे संगोपन करण्याची संस्कृती रुजविण्याचा प्रयत्न या उपक्रमातून केला जात आहे.

ॲड. कळसकर यांनी यापूर्वीही ॲड. सागर गायकवाड व ॲड. दिगंबर भंडारी यांचे वाढदिवस वृक्षभेट देऊन साजरे केले आहेत. त्यामुळे हा उपक्रम आता बार असोसिएशनमध्ये पर्यावरणपूरक उपक्रम म्हणून आकार घेत आहे.

वृक्षसंवर्धनाची आवड असलेल्या ॲड. गणेश कळसकर यांनी तांदळी येथे ‘देवराई’ हा अनोखा पर्यावरण संवर्धन प्रकल्प उभारला आहे. या प्रकल्पात देशी औषधी वनस्पतींसह सुमारे ११८ प्रकारच्या झाडांची लागवड करण्यात आली आहे. ॲड. गणेश कळसकर व त्यांचे वडील वृक्षमित्र वामनराव कळसकर यांनी स्वखर्चातून या वृक्षांचे संगोपन व संवर्धन केले आहे. या प्रकल्पाचे जिल्हास्तरावरूनही कौतुक झाले आहे.

या वेळी बार असोसिएशनचे खजिनदार ॲड. धनंजय गायकवाड, सदस्य ॲड. गणेश सटाले, ॲड. गणेश चौगुले, ग्रंथपाल ॲड. सचिन ओव्हाळ यांच्यासह ज्येष्ठ विधिज्ञ, आजी-माजी पदाधिकारी मोठ्या संख्येने उपस्थित होते. कार्यक्रमाचे सूत्रसंचालन ॲड. सचिन ओव्हाळ यांनी केले, तर आभार ॲड. धनंजय गायकवाड यांनी मानले. वाढदिवसाचा आनंद आणि पर्यावरण संवर्धनाची जबाबदारी एकाच वेळी जपणाऱ्या या उपक्रमातून ‘एक वाढदिवस, एक वृक्ष’ हा सकारात्मक संदेश समाजापर्यंत पोहोचत आहे.