Praful Patel NCP President Clarification : आपली पक्षाच्या राष्ट्रीय अध्यक्षपदी नियुक्ती झाल्याचे वृत्त निराधार असल्याचे राष्ट्रवादी काँग्रेस पक्षाचे कार्याध्यक्ष प्रफुल्ल पटेल यांनी स्पष्टीकरण दिले आहे. राष्ट्रवादी काँग्रेस पक्षाच्या राष्ट्रीय अध्यक्षपदी माझ्या नियुक्तीबाबत माध्यमांमध्ये प्रसारित होत असलेल्या काही वृत्तांची मी दखल घेतली आहे. मला हे पूर्णपणे स्पष्ट करायचे आहे की, ही वृत्ते पूर्णपणे निराधार असून त्यात कोणतेही तथ्य नाही, असे पटेल यांनी एक्सवरील एका पोस्टमध्ये म्हटले आहे. केंद्रीय मंत्री पियुष गोयल यांनी एका मुलाखतीत केलेल्या वक्तव्यानंतर पटेल यांचे हे विधान आले आहे. पटेल म्हणाले, राष्ट्रवादी काँग्रेस पक्ष ही एक लोकशाही संस्था आहे. इतक्या मोठ्या निर्णयासाठी आमच्या वरिष्ठ नेत्यांशी आणि आमदारांशी सल्लामसलत केली जाईल. आमच्या समर्पित पदाधिकाऱ्यांशी संवाद साधला जाईल आणि आमच्या सर्व पक्ष सदस्यांच्या भावना व सामूहिक इच्छेचा आदर केला जाईल. एक राष्ट्रीय पक्ष असल्याने आम्ही या बाबतीत प्रस्थापित प्रक्रियेचे पालन करतो. यानंतर, गोयल यांनी एक्सवरील एका पोस्टमध्ये म्हटले आहे की, त्यांनी चुकीच्या माहितीच्या आधारावर ते वक्तव्य केले होते. प्रफुल्ल पटेल यांची राष्ट्रवादी काँग्रेस पक्षाच्या अध्यक्षपदी निवड झाली आहे. माहितीची पडताळणी न करता मी माध्यमांमध्ये काही विधाने केली होती, परंतु नंतर समोर आले की ती माहिती चुकीची होती. राष्ट्रवादी काँग्रेस पक्ष उपमुख्यमंत्री सुनेत्रा अजितदादा पवार यांच्या नेतृत्वाखाली काम करत आहे. दिशाभूल करणाऱ्या माहितीबद्दल मी खेद व्यक्त करतो, असे गोयल म्हणाले.
