प्रभात वृत्तसेवा शिर्डी – प्रसिद्ध शिवमहापुराण कथाकार प्रदीप मिश्रा यांचे शिर्डी व राहाता शहरात भव्य स्वागत करण्यात आले. शिर्डी व राहाता शहरातील नगर -मनमाड महामार्गावर फुलांची उधळण करीत भगव्या मंगलमय हर हर महादेवचा जयघोषाने परिसर दुमदुमून गेला होता.पंडीत प्रदीप मिश्रा महाराजांचे शिर्डीत साडेचार व राहाता शहरात साडेपाच वाजता आगमन झाले. डॉ. सुजय विखे पाटील यांनी त्यांच्या गाडीचे सारथ्य केले. पूर्ण मार्ग भगव्या झेंड्यांनी, फुलांच्या तोरणांनी सजविण्यात आला होता. महिलांनी डोक्यावर कलश घेऊन महाराजांच्या स्वागत सोहळ्यात उपस्थिती दाखवली. संपूर्ण परिसर भक्तिभावाने उजळून निघाला आहे. स्वागत सोहळ्यात वारकरी दिंडी, झांजपथक, ढोल पथक, तसेच महिलांकडून फुलांची आरती आणि पारंपरिक स्वागत करण्यात आले. महिला मंडळांनी विशेष लाईनमध्ये उभे राहून महाराजांवर पुष्पवृष्टी केली. यावेळी शेकडो भाविकांनी “हर हर महादेव”च्या जयघोषात महाराजांचे स्वागत करत वातावरण दुमदुमविले. शिर्डी व राहाता शहरात आयोजित स्वागत मिरवणुकीत महिला, युवक व नागरिकांनी उत्साहाने सहभाग घेतले. प्रदीप मिश्रा यांचे विमानतळावर पालकमंत्री राधाकृष्ण विखे पाटील विखे पाटील यांनी स्वागत केले. शिर्डी विमानतळावर पोहोचताच खासदार डॉ. सुजय विखे पाटील यांनी स्वतः कार चालवत महाराजांना विमानतळावरून स्वागतस्थळी आणले. याप्रसंगी नागरिकांनी जोरदार घोषणांनी महाराजांचे स्वागत केले.भाविकांनी रस्त्याच्या दुतर्फा उभे राहून महाराजांचे स्वागत केले. मोठ्या प्रमाणत पुष्पवृष्टी करण्यात आली.शहरातील चौकात भव्य हार घालून शहरवासियांनी त्यांचे स्वागत केले. मंत्री राधाकृष्ण विखे पाटील यांच्यासह सर्व पदाधिकारी कार्यकर्ते उपस्थित होते. राहाता ते लोणी या मार्गावरून युवकांनी दुचाकी वाहनांची रॅली काढून महाराजांचे उत्स्फूर्त स्वागत केले. या स्वागताच्या कार्यक्रमात स्थानिक कार्यकर्ते, महिला मंडळे, युवक संघटना व नागरिक मोठ्या संख्येने उपस्थित होते. महाराजांच्या प्रवचनासाठी भाविकांची मोठी गर्दी अपेक्षित असून, परिसर भक्तिभावाने सज्ज झाला आहे.
