Portuguese Footballer Quevin Castro Dies After Collapsing On Pitch : फुटबॉल जगताला हादरवून टाकणारी एक अत्यंत धक्कादायक आणि दुःखद घटना समोर आली आहे. पोर्तुगालचा २५ वर्षीय युवा फुटबॉलपटू क्यूविन कास्त्रो (Quevin Castro) याचा सामन्यादरम्यान भर मैदानात कोसळल्यानंतर मृत्यू झाला आहे. शनिवारी लिस्बनमध्ये ‘रिअल स्पोर्ट क्लब’ आणि ‘एस्ट्रेला डि अमाडोरा’ यांच्यात खेळल्या गेलेल्या प्री-सीझन मैत्रीपूर्ण (Friendly Match) सामन्यादरम्यान ही काळीज पिळवटून टाकणारी घटना घडली. लिस्बन फुटबॉल असोसिएशनने (LFA) त्याच्या निधनाच्या वृत्ताला अधिकृत दुजोरा दिला आहे.

सामन्याच्या २२व्या मिनिटाला मैदानात कोसळला; रुग्णालयात प्राणज्योत मालवली!

पोर्तुगालच्या चौथ्या विभागातील लीगमध्ये ‘रिअल स्पोर्ट क्लब’चे प्रतिनिधित्व करणारा कास्त्रो नेहमीप्रमाणे पूर्ण उत्साहात मैदानात उतरला होता. मात्र, सामन्याच्या २२व्या मिनिटाला तो अचानक धावताना जमिनीवर कोसळला. वैद्यकीय पथकाने तातडीने मैदानात धाव घेत त्याला कृत्रिम शॉक (Defibrillator) देऊन शुद्धीवर आणण्याचा सर्वतोपरी प्रयत्न केला. त्यानंतर त्याला तातडीने जवळच्या रुग्णालयात दाखल करण्यात आले; मात्र डॉक्टरांनी उपचारादरम्यान त्याला मृत घोषित केले. या दुर्दैवी घटनेनंतर सामना तत्काळ रद्द करण्यात आला.

माजी इंग्लिश क्लब वेस्ट ब्रॉम २५व्या मिनिटाला देणार अनोखी श्रद्धांजली!

In November 2022, Quevin Castro, 25, scored this free kick for Notts County.

Today he collapsed and DIED why playing for club Real Sport Clube.😭💔pic.twitter.com/gLdFryZvx0

— Football Faithfuls (@FootyFaithfuls) August 22, 2026

कास्त्रोच्या अकाली निधनाने फुटबॉल क्लब्समध्ये हळहळ व्यक्त होत आहे. रिअल स्पोर्ट क्लबने त्याला आपल्या कुटुंबाचा अविभाज्य भाग असल्याचे सांगत भावपूर्ण श्रद्धांजली वाहिली. तर त्याचा माजी इंग्लिश क्लब वेस्ट ब्रॉमविच अल्बियनने (West Bromwich Albion) त्याच्या स्मरणार्थ रविवारी बर्नलेविरुद्धच्या सामन्यात सर्व खेळाडू काळी फित बांधून उतरणार असल्याचे जाहीर केले. तसेच सामन्याच्या २५व्या मिनिटाला टाळ्यांचा कडकडाट करून मैदानात त्याला अनोखी मानवंदना दिली जाईल.

हेही वाचा – Padikkal Consecutive Century : देवदत्त पडिक्कलचे श्रीलंकेत तुफान! सलग दुसऱ्या कसोटीत झळकावलं शतक; टीम इंडियाचा नंबर-३ चा प्रश्न मिटवला

इंग्लंडच्या अनेक क्लब्सकडून खेळला; २०२१ मध्ये आर्सेनलविरुद्ध पदार्पण!

क्यूविन कास्त्रोची फुटबॉल कारकीर्द प्रामुख्याने इंग्लंडमध्ये बहरली. २०२१ मध्ये वेस्ट ब्रॉमच्या अकादमीशी जोडल्या गेलेल्या कास्त्रोने त्याच वर्षी बलाढ्य आर्सेनलविरुद्ध लीग कपमधून सीनियर संघात पदार्पण केले होते. त्यानंतर त्याने बर्टन अल्बियन, नॉट्स काउंटी, गेट्सहेड, यॉर्क सिटी आणि केंब्रिज सिटी यांसारख्या अनेक नामांकित क्लब्सचे प्रतिनिधित्व केले. २०२३ मध्ये वेस्ट ब्रॉम सोडल्यानंतर याच हंगामात तो पुन्हा आपल्या मायदेशी पोर्तुगालमध्ये परतला होता; मात्र वयाच्या अवघ्या २५व्या वर्षी काळाने त्याच्यावर अचानक झडप घातली.