नवी दिल्ली : दिल्ली उच्च न्यायालयात पूजा खेडकरच्या खटल्याची सुनावणी पुन्हा एकदा पुढे ढकलण्यात आली आहे. आता या प्रकरणाची सुनावणी 4ऑक्टोबर रोजी होणार असून, तोपर्यंत पूजा खेडकर यांना अटकेपासून दिलेली मुक्तताही कायम राहणार आहे. पूजा खेडकर यांच्या वकिलांनी दिल्ली उच्च न्यायालयात बाजू मांडण्यासाठी आणखी वेळ मागितला आहे. दरम्यान, दिल्ली पोलिसांच्या वकिलाने न्यायालयाला सांगितले की, तपास जसजसा पुढे जात आहे, तसतसे या प्रकरणात मोठे षडयंत्र समोर येत आहे. यापूर्वी या प्रकरणाची सुनावणी ५ सप्टेंबरला झाली होती. यामध्ये पूजाने न्यायालयाला सांगितले होते की, ती एम्समध्ये तिच्या अपंगत्वाची तपासणी करण्यास तयार आहे. सुनावणीनंतर न्यायमूर्ती सुब्रमण्यम प्रसाद म्हणाले होते की, पोलिसांनी या प्रकरणाच्या तपासासाठी 10 दिवसांचा वेळ मागितला आहे, त्यामुळे सुनावणी पुढे ढकलण्यात येत आहे.
