मुंबई : दाक्षिणात्य चित्रपटसृष्टीत बॉलिवूड कलाकारांना प्रचंड यश मिळाल्याचे आपण पहिले आहे. त्यातही बॉलिवूडच्या अभिनेत्रींना इकडे यश, प्रसिद्धी आणि पैसा मोठ्या प्रमाणात मिळत असतो. याच बॉलिवूड अभिनेत्रींमध्ये अग्रक्रमाने नाव येते ते म्हणजे पूजा हेगडे हिचे.  2012 मध्ये तिने तमिळ चित्रपटसृष्टीत पदार्पण केले. त्यानंतर तिने काही तेलुगू चित्रपटांमध्येही काम केले.

तेलुगू चित्रपटसृष्टीत तिला इतकी लोकप्रियता मिळाली की, अनेक सुपरस्टार्सना त्यांच्या चित्रपटासाठी अभिनेत्री म्हणून आता पूजाच हवी असते. याच यशामुळे आता पूजाने तिच्या मानधनातही वाढ केली आहे. पूजा बॉलिवूडमध्ये जरी अपयशी ठरली असली तरी दाक्षिणात्य चित्रपटसृष्टीत तिच्याकडे यशस्वी कलाकार म्हणून पाहिले जाते.

पूजा सध्या विजय देवरकोंडासोबत ‘जन गण मन’ या चित्रपटाच्या शूटिंगमध्ये व्यस्त आहे.  एका इंग्रजी वृत्तवाहिनीने दिलेल्या वृत्तानुसार, आता नयनतारा आणि समंथा यांच्यासोबत पूजासुद्धा दाक्षिणात्य चित्रपटसृष्टीत सर्वाधिक मानधन घेणारी अभिनेत्री ठरली आहे. नयनतारा एका चित्रपटासाठी 7 कोटी रुपये मानधन घेते. तर समंथा एका चित्रपटासाठी तीन ते सहा कोटी रुपये मानधन घेते. आता अशी चर्चा आहे की पूजा तिच्या चित्रपटासाठी जवळपास पाच कोटी रुपये मानधन घेते. विजय देवरकोंडासोबतच्या या चित्रपटासाठी तिने 5 कोटी रुपये इतकी फी घेतली आहे.

पूजाने दाक्षिणात्य चित्रपटसृष्टीतील स्टार्स अल्लू अर्जुन, प्रभास, रामचरण यांच्यासोबत काम केले आहे. आता ती ‘अर्जुन रेड्डी’ फेम विजयसोबत काम करणार आहे. याशिवाय ती आणखी दोन हिंदी चित्रपटांमध्येही झळकणार आहे. जवळपास पाच वर्षांनंतर ती बॉलिवूडमध्ये परतणार आहे. ‘सर्कस’ आणि ‘कभी ईद कभी दिवाली’ या चित्रपटांमध्ये ती भूमिका साकारणार असल्याचे सांगण्यात येत आहे.