Mithilesh Tiwari :  बिहारमध्ये नवीन सरकार स्थापन झाल्यानंतर राज्य मंत्रिमंडळाचा विस्तार करण्यात आला. यावेळी मिथिलेश तिवारी (Mithilesh Tiwari) यांच्याकडे शिक्षण विभागाचा कार्यभार सोपवण्यात आला आहे. मात्र, शिक्षणमंत्री म्हणून पदभार स्वीकारल्यानंतर लगेचच, सोशल मीडियावर व्हायरल झालेल्या दोन व्हिडिओंमुळे तिवारी वादात सापडले आहेत.

या व्हिडिओंमध्ये दिसणाऱ्या त्यांच्या वक्तव्यांवर आणि सार्वजनिक उपस्थितीवर काँग्रेस आणि इतर विरोधी पक्षांनी मंत्र्यांवर (Mithilesh Tiwari) तीव्र टीका केली आहे. व्हायरल झालेल्या एका व्हिडिओमध्ये मिथिलेश तिवारी शिक्षण आणि मुलींबद्दल बोलताना दिसत आहेत.

मुलींच्या शिक्षणाबाबत विधानाने गोंधळ
एका व्हायरल व्हिडिओमध्ये मिथिलेश तिवारी (Mithilesh Tiwari) शिक्षण आणि मुलींबाबत बोलताना दिसत आहेत. त्यात ते म्हणतात, “मुलींना शिक्षणाची काय गरज आहे… ? आपल्या घरच्या मुली आमची शक्ती आहेत… त्या आमच्या समृद्धीचा पाया आहेत… जेव्हा मोदीजी महिला सक्षमीकरणासाठी उभे आहेत, तेव्हा त्या मुलींना रस्त्यावर का यायला हवे?” त्यावर पत्रकारिणी  “हक्कांसाठी” असे उत्तर देताच तिवारी म्हणतात, “तुम्हाला तुमचे हक्क मिळणारच आहेत.”हा व्हिडिओ सोशल मीडियावर मोठ्या प्रमाणात शेअर झाला असून, अनेक वापरकर्ते मंत्री तिवारी यांची टीका करत आहेत.

राष्ट्रीय जनता दलाने (आरजेडी) शेअर केलेल्या आणखी एका व्हिडिओमध्ये मिथिलेश तिवारी मंदिरात जाऊन धार्मिक विधींमध्ये सहभागी होताना दिसत आहेत. सोमवारी हा व्हिडिओ शेअर करताना, आरजेडीने मंत्र्यांची खिल्ली उडवली आणि राज्य सरकारच्या शिक्षण धोरणांवर प्रश्नचिन्ह उपस्थित केले.

Meet the new Education Minister of Bihar, Mithilesh Tiwari. He says girls do not need education and should stay at home.🤦🏻‍♂️ pic.twitter.com/jjuoqOpDbX

— Manish RJ (@mrjethwani1) May 10, 2026

तर पक्षाने लिहिले, “हे आहेत बिहारचे शिक्षण मंत्री मिथिलेश तिवारी. नितीश कुमार यांनी २१ वर्षांत बिहारची एकेकाळची मजबूत शिक्षण व्यवस्था पूर्णपणे उद्ध्वस्त केली आहे, आणि आता तिवारी भूतबाधा आणि विधींच्या माध्यमातून दर्जेदार शिक्षण देणार आहेत.”

या पोस्टमध्ये पुढे म्हटले आहे की, आरजेडी नेते तेजस्वी यादव यांनी पूर्वी शिक्षण विभागाचे प्रभारी असताना अल्पावधीत २२ लाख शिक्षकांची भरती केली होती. पक्षाने असाही आरोप केला आहे की, शिक्षक बनू इच्छिणाऱ्या उमेदवारांना आता नोकरी मागितल्याबद्दल पोलीस कारवाईला सामोरे जावे लागत आहे.