बंगळुरू : कॉंग्रेसची सत्ता असणाऱ्या कर्नाटकमध्ये मुख्यमंत्री बदलाच्या चर्चांचा धुरळा उडणे सुरूच आहे. त्यामुळे संभ्रमाचे, अनिश्‍चिततेचे वातावरण निर्माण झाले आहे. त्या पार्श्‍वभूमीवर, कर्नाटकमधील दोन ज्येष्ठ मंत्र्यांनी मंगळवारी संबंधित चर्चांना पूर्णविराम देण्याचे साकडे कॉंग्रेस श्रेष्ठींना घातले. कर्नाटकात मे २०२३ मध्ये विधानसभा निवडणूक झाली. त्या निवडणुकीत बाजी मारून कॉंग्रेसने त्या राज्याची सत्ता हस्तगत केली. मात्र, मुख्यमंत्री पदावरून पक्षात मोठी रस्सीखेच झाली.

सिद्धरामय्या आणि डी.के.शिवकुमार या तगड्या दावेदारांमुळे पेचाची स्थिती निर्माण झाली. अखेर कॉंग्रेस श्रेष्ठींनी तोडगा काढत सिद्धरामय्या यांना मुख्यमंत्री, तर शिवकुमार यांना उपमुख्यमंत्री बनवले. त्यावेळी निम्म्या कार्यकाळानंतर (अडीच वर्षे) मुख्यमंत्री बदल करण्याचा समझोता झाल्याचे बोलले जाते. अर्थात, कॉंग्रेसमधून त्याला कधीच अधिकृत दुजोरा देण्यात आला नाही.

मात्र, कथित समझोत्याचा आधार घेत कर्नाटकमध्ये सातत्याने मुख्यमंत्री बदलाची शक्यता वर्तवली जाते. अशात कर्नाटक सरकारचा निम्मा कार्यकाळ पूर्ण होत आला आहे. पुढील महिन्यात म्हणजे नोव्हेंबरमध्ये सिद्धरामय्या सरकार अडीच वर्षांचे होईल. त्यामुळे प्रदेश कॉंग्रेसमध्ये मुख्यमंत्री बदलाच्या चर्चांनी पुन्हा जोर धरला आहे. त्या पार्श्‍वभूमीवर, कर्नाटकचे मंत्री सतीश जारकीहोळी यांनी संबंधित चर्चांवर प्रतिक्रिया दिली. चर्चा थांबवा असे आता कॉंग्रेस श्रेष्ठींनीच म्हणावे. श्रेष्ठींनी तसे करणे चांगले ठरेल. अन्यथा, पक्षात आणि नोकरशाहीत संभ्रमाची स्थिती राहील, असे ते पत्रकारांशी बोलताना म्हणाले.

जारकीहोळी यांची भूमिका आणखी एक मंत्री जी.परमेश्‍वर यांनी उचलून धरली. जारकीहोळी यांच्याप्रमाणेच मलाही संभ्रम दूर होणे गरजेचे असल्याचे वाटते. आमच्या पक्षातूनच दररोज वेगळी वक्तव्ये केली जातात. त्यामुळे निर्माण होणारी अनिश्‍चितता दूर व्हायला हवी. पक्षश्रेष्ठी निश्‍चित तसे करतील, असा विश्‍वास परमेश्‍वर यांनी व्यक्त केला. सिद्धरामय्या पाच वर्षांचा कार्यकाळ पूर्ण करतील, अशी भावना त्यांचे समर्थक व्यक्त करतात. तर, मुख्यमंत्री बदल होईल, असे भाकीत शिवकुमार यांचे समर्थक करतात. त्यामुळे कर्नाटक कॉंग्रेसमध्ये सत्तास्पर्धा सुरू असल्याचे चित्र वारंवार समोर येते.