अहमदनगर : महाराष्ट्राचे कृषिमंत्री माणिकराव कोकाटे यांचा विधानसभेत रम्मी गेम खेळतानाचा व्हायरल व्हिडिओमुळे राजकीय वाद पेटला आहे. विरोधक आणि शेतकरी संघटना कोकाटे यांच्या राजीनाम्याची मागणी करत असताना, मंत्री राधाकृष्ण विखे पाटील यांनी कोकाटेंची पाठराखण केली आहे. “माणिकराव कोकाटेंना व्यक्तीस्वातंत्र्य आहे की नाही? कुणी काय करावं, हे कोण ठरवणार?” असा सवाल विखे पाटील यांनी उपस्थित केला. कोकाटे यांनी खुलासा केला असून, लगेच त्यांना आरोपी ठरवणं चुकीचं आहे, असंही ते म्हणाले.

लातूरमध्ये छावा संघटनेने राष्ट्रवादीचे (अजित पवार गट) प्रदेशाध्यक्ष सुनिल तटकरे यांच्यासमोर पत्ते फेकून निषेध व्यक्त केला, ज्यामुळे मारहाणीची घटनाही घडली. कोकाटे यांनी व्हिडिओ फेक असल्याचा दावा करत, तो युट्यूबवरील जाहिरात स्किप करताना काढला गेल्याचं स्पष्टीकरण दिलं आहे. विखे पाटील यांनी हा व्हिडिओ कोणी शूट केला याचा शोध घेण्याची गरज असल्याचं म्हटलं. “सभागृहात अनेकजण बातम्या पाहतात. रम्मीचा डाव आला म्हणून कोकाटे गेम खेळत होते, असा अर्थ नाही. त्यांच्या कृत्याने कुणाचं नुकसान झालं का?” असा सवालही त्यांनी केला.

विखे पाटील यांनी महायुतीवर होणारा परिणाम व्यक्त करत, चुका करणाऱ्या पक्षांनी स्वतःला सुधारावं, असं सांगितलं. तसेच, सूरज चव्हाण यांच्या अतिउत्साही कार्यकर्त्यांमुळे पक्ष अडचणीत येतो, असा टोला त्यांनी लगावला. सुनिल तटकरे यांनीही या घटनेचा निषेध केला असून, चव्हाण यांचा राजीनामा घेतला आहे.