लाहोर : पाकिस्तानचे माजी पंतप्रधान आणि ‘पाकिस्तान तहरीक-ए-इन्साफ’ पक्षाचे प्रमुख इम्रान खान यांनी एक मोठी घोषणा केली आहे. ‘पीटीआय’च्या देशातील सर्व विधानसभा जागा सोडण्याचा निर्णय खान यांनी जाहीर केला असल्याचे वृत्त पाकिस्तानच्या एका वर्तमानपत्राने दिले आहे. त्यामुळे देशात लवकरच मध्यावधी निवडणूक लागण्याची शक्यता वर्तवण्यात येत आहे.

रावळपिंडीत झालेल्या जाहीर सभेत सर्व विधानसभा जागांचा राजीनामा देण्याचा निर्णय घेतल्या इम्रान खान यांना सांगितलं आहे. ७० वर्षी इम्रान खान यांनी या जागा सोडण्याबाबत राज्यातील मुख्यमंत्र्यांशी चर्चा केली आहे. पक्षाच्या संसदीय समितीच्या बैठकीनंतर अंतिम निर्णय जाहीर केला जाणार आहे. “आपल्या देशाचे नुकसान करण्याऐवजी ही भ्रष्ट व्यवस्था सोडून जाणेच योग्य आहे”, असे खान यांनी म्हटले आहे. देशात लवकरात लवकर निवडणूक घेण्यास सत्ताधाऱ्यांना भाग पाडण्यासाठी खान यांच्याकडून दबाव टाकण्याचा प्रयत्न केला जात आहे.

पक्षाचा ‘हकेकी आझादी’ मोर्चा इस्लामाबादच्या दिशेने जाणार नाही, असेही खान यांनी स्पष्ट केले आहे. देशात अराजकता माजू नये, यासाठी हा निर्णय घेतल्याचं त्यांनी म्हटलं आहे. “आम्हीही श्रीलंकेसारखी परिस्थिती निर्माण करू शकलो असतो. पण इस्लामाबादचा मोर्चा सरकारला परवडणारा नाही. ते लाखो लोकांना इस्लामाबादमध्ये प्रवेश करण्यापासून रोखू शकत नाहीत.

जर दंगली भडकल्या तर परिस्थिती सर्वांच्याच हाताबाहेर जाईल. त्यामुळे देशात अराजकता माजेल, असं कुठलंही पाऊल मला उचलायचं नाही”, असे खान म्हणाले आहेत.