शिरूर : शिरूर शहरात 16 आणि 17 मे रोजी दोन अल्पवयीन मुली कोणालाही काही न सांगता घरातून निघून गेल्याच्या तक्रारी शिरूर पोलीस स्टेशनला प्राप्त झाल्या होत्या. या प्रकरणी शिरूर पोलीस स्टेशनने गुन्हा रजिस्टर क्रमांक 334/2025 आणि 339/2025 अंतर्गत भारतीय न्याय संहिता कलम 137(2) अन्वये गुन्हे दाखल करून तपासाची जबाबदारी पोलीस उपनिरीक्षक शुभम चव्हाण यांच्याकडे सोपवली होती. 48 तासांत पोलिसांनी तांत्रिक माहिती आणि गुप्त बातमीदारांच्या आधारे या दोन्ही मुलींचा शोध घेऊन 18 मे रोजी त्यांना त्यांच्या पालकांच्या ताब्यात दिले आहे.

आव्हानात्मक तपास –
दोन्ही मुलींकडे मोबाईल फोन नसल्याने आणि त्यांच्या पालकांना त्यांच्या गैरहजेरीच्या कारणाबाबत कोणतीही माहिती नसल्याने पोलिसांसमोर या गुन्ह्यांचा तपास करणे मोठे आव्हान होते. शिरूर पोलीस स्टेशनचे प्रभारी अधिकारी संदेश केंजळे यांनी गुन्ह्याचे गांभीर्य आणि संवेदनशीलता लक्षात घेऊन तातडीने गुन्हे प्रकटीकरण पथक तयार केले. पथकाला मुलींचा शोध घेण्याचे आदेश देताना त्यांनी तांत्रिक माहिती आणि गुप्त बातमीदारांचा वापर करण्याचे निर्देश दिले.

मुलींनी सांगितले घर सोडल्याचे कारण –
पोलिसांनी दोन्ही मुलींचा शोध घेऊन त्यांना 18 मे रोजी सुखरूप पालकांच्या ताब्यात दिले. चौकशीदरम्यान मुलींनी सांगितले की, पालकांशी किरकोळ कारणांवरून झालेल्या भांडणाच्या रागातून त्यांनी घर सोडले होते. या प्रकरणाचा पुढील तपास शिरूर पोलीस स्टेशनकडून सुरू आहे.

पोलिसांची यशस्वी कामगिरी –
या यशस्वी कामगिरीत पुणे ग्रामीणचे पोलीस अधीक्षक संदीप गिल, अपर पोलीस अधीक्षक रमेश चोपडे, शिरूर उपविभागीय पोलीस अधिकारी प्रशांत ढोले, शिरूर पोलीस स्टेशनचे प्रभारी अधिकारी संदेश केंजळे यांच्या मार्गदर्शनाखाली गुन्हे प्रकटीकरण पथकाचे पोलीस उपनिरीक्षक शुभम चव्हाण, पोलीस हवालदार दीपक राऊत, पोलीस अंमलदार नितेश थोरात, विजय शिंदे, सचिन भोई, नीरज पिसाळ, निखिल रावडे, अजय पाटील, रवींद्र आव्हाड, अशोक वितारे, महिला पोलीस अंमलदार गोदावरी थंदरे आणि कल्याणी कोडवते यांनी महत्त्वपूर्ण भूमिका बजावली.

दरम्यान, शिरूर पोलिसांनी अवघ्या 48 तासांत दोन्ही अल्पवयीन मुलींचा शोध घेऊन त्यांना सुखरूप पालकांच्या ताब्यात देण्याची उल्लेखनीय कामगिरी केली आहे. या घटनेमुळे पालकांमध्ये मुलांशी संवाद आणि त्यांच्या भावनिक गरजांकडे लक्ष देण्याची गरज अधोरेखित झाली आहे. पोलिसांनी या प्रकरणात दाखवलेल्या तत्परतेमुळे स्थानिक नागरिकांमध्ये समाधान व्यक्त होत आहे.