PNB : पंजाब नॅशनल बँकेने (PNB) काही निष्क्रिय खाती बंद करण्याचा निर्णय घेतला आहे. 10 नोव्हेंबरनंतर ही कारवाई होऊ शकते. त्यामुळे पीएनबीच्या ग्राहकांनी आपले खाते या यादीत येते का, याची तपासणी करणे महत्त्वाचे आहे. खाते बंद होऊ नये यासाठी संबंधित शाखेत जाऊन आवश्यक कागदपत्रे सादर करता येतील.

कोणती खाती बंद होणार?
ज्या खात्यांमध्ये 30 सप्टेंबर 2023 नंतर कोणताही व्यवहार झालेले नाही आणि खात्यात शून्य शिल्लक (Zero Balance) आहे, अशी खाती बंद होण्याची शक्यता आहे. खात्याचा गैरवापर आणि त्यातील जोखीम कमी करण्यासाठी ही कारवाई केली जात असल्याचे बँकेने सांगितले आहे.

24 महिने व्यवहार नसल्यास खाते निष्क्रिय –
पीएनबीच्या नियमांनुसार, ग्राहकाने सलग 24 महिने खात्यात कोणताही व्यवहार केला नाही, तर खाते इनऑपरेटिव्ह म्हणजेच निष्क्रिय होऊ शकते. यामध्ये आर्थिक व्यवहारांसोबतच गैर-आर्थिक व्यवहारांचाही विचार केला जातो. केवायसी अपडेट करणे किंवा एखाद्या सेवा अथवा उत्पादनाबाबत विनंती करणे, हेही काही परिस्थितीत गैर-आर्थिक व्यवहार मानले जातात.

खाते बंद होण्याचा धोका असेल तर काय करावे?
ज्या ग्राहकांना आपले खाते बंद होण्याची शक्यता वाटत आहे, त्यांनी 10 नोव्हेंबरपूर्वी संबंधित पीएनबी शाखेत जाऊन केवायसी कागदपत्रे सादर करावीत. खात्याची स्थिती जाणून घेण्यासाठी जवळच्या शाखेतही संपर्क करता येईल.

ग्राहकांना पासपोर्ट, मतदार ओळखपत्र किंवा ड्रायव्हिंग लायसन्स यांसारखे सरकारमान्य ओळखपत्र आणि पत्त्याचा पुरावा द्यावा लागू शकतो. याशिवाय पॅन किंवा फॉर्म 16 यांसारखी करसंबंधित कागदपत्रेही मागितली जाऊ शकतात. खाते पुन्हा सुरू करण्यासाठी शाखेत विनंती अर्ज द्यावा लागेल. बँकेच्या केवायसी नियमांनुसार अतिरिक्त कागदपत्रेही मागितली जाऊ शकतात.

कागदपत्रांची पडताळणी झाल्यानंतर बँक खाते पुन्हा कार्यरत करू शकते. अधिक माहितीसाठी ग्राहक 1800-1800 किंवा 1800-2021 या पीएनबीच्या टोल-फ्री क्रमांकावर संपर्क करू शकतात.