पिंपरी – पुणे महानगर प्रदेशातील खेड तालुक्यातील अत्यंत महत्त्वाच्या मानल्या जाणाऱ्या चाकण औद्योगिक परिसरातील तीव्र वाहतूक कोंडीवर मात करण्यासाठी विविध प्रमुख रस्त्यांच्या सुधारणांसह उच्च क्षमतेच्या सिमेंट काँक्रीट (पीक्यूसी) रस्ते बांधणीच्या कामांना पुणे महानगर प्रदेश विकास प्राधिकरणाकडून (पीएमआरडीए) गती देण्यात आली आहे.

औद्योगिक क्षेत्रातील अवजड मालवाहतूक आणि कामगारांच्या दैनंदिन प्रवासातील अडथळे दूर करून वाहतूक सुरळीत करण्याच्या दृष्टीने ही विकासकामे अत्यंत महत्त्वाची ठरणार आहेत. पीएमआरडीएने पायाभूत सुविधा योजनेअंतर्गत क्षेत्रातील चार प्रमुख मार्गांची कामे एकाच वेळी हाती घेतली आहेत.

त्यापैकी चिखली ते मोई या १.६५० किलोमीटर लांबीच्या रस्त्याचे पीक्यूसी काँक्रीटीकरण सुरू असून, त्यातील सुरुवातीच्या ५१० मीटर अंतराची डावी बाजू पूर्ण झाली आहे. त्याचप्रमाणे, कुरुळी फाटा ते निघोजे या २.५०० किलोमीटर लांबीच्या टप्प्यापैकी साखळी क्रमांक २.०७० ते २.५५० या डाव्या बाजूच्या रस्त्याचे काम मार्गी लागले आहे.

औद्योगिक वसाहतीतील थेट जोडणी मजबूत करणाऱ्या निघोजे ते चाकण एमआयडीसी या १.२५० किलोमीटर लांबीच्या रस्त्यावर ७१० मीटर ते १.१०० किलोमीटरदरम्यानच्या टप्प्याचे काँक्रीटीकरण पूर्ण करण्यात आले आहे.

याशिवाय, खालुंब्रे ते एमआयडीसी फेज ३ या १.७५० किलोमीटर लांबीच्या अत्यंत महत्त्वाच्या मार्गावरही काम वेगाने सुरू असून, १.३२० ते १.४९० किलोमीटरदरम्यान डाव्या बाजूचा टप्पा पूर्ण झाला आहे.

चाकण आणि परिसरातील उद्योगांमध्ये दररोज होणारी शेकडो अवजड वाहनांची ये-जा तसेच औद्योगिक कामगारांची गर्दी लक्षात घेता, या दर्जेदार काँक्रीट रस्त्यांमुळे वाहतूक कोंडीचा दीर्घकालीन प्रश्न सुटण्यास मदत होईल. रस्त्यांच्या गुणवत्तेवर विशेष भर दिला जात असून, बांधकामाच्या ठिकाणी आवश्यकतेनुसार क्युरिंग आणि पाणी मारण्याचे कामही नियमबद्ध रीतीने पार पाडले जात आहे.

Crime News: गणपती सजावटीच्या सामानावरून वडिलांना पाइपने मारहाण