नवी दिल्ली – संसदेच्या अर्थसंकल्पीय अधिवेशनात राष्ट्रपतींच्या अभिभाषणाला उत्तर देताना पंतप्रधान नरेंद्र मोदी यांनी सोमवारी काँग्रेस पक्षावर जोरदार निशाणा साधला. काँग्रेस पक्ष आपला अहंकार सोडत नसल्याचा आरोप त्यांनी केला. एवढ्या पराभवानंतरही तुमचा अहंकार कायम आहे आणि तुम्ही त्यातून मुक्त होऊ शकत नाही’, असे पीएम मोदी म्हणाले. पंतप्रधानांच्या या भाषणादरम्यान लोकसभेतील काँग्रेस संसदीय पक्षाचे नेते अधीर रंजन चौधरी यांनी अडवणूक करून काही बोलण्याचा प्रयत्न केला, त्यानंतर पंतप्रधानांनी काँग्रेसवर शेरच्या माध्यमातून हल्ला केला. ते म्हणाले… वह जब दिन को रात कहें तो तुरंत मान लो अगर नहीं माने तो वे दिन में नकाब ओढ़ लेगे जरूरत हुई तो हकीकत को थोड़ा बहुत मरोड़ लेंगे वे मगरूर है खुद की समझ पर बेइंतहा उन्हें आईना मत दिखाओ, वे आईना भी तोड़ देंगे.. करोनाच्या काळातील काँग्रेसच्या वृत्तीवरही पंतप्रधानांनी प्रश्नचिन्ह उपस्थित केले. ते म्हणाले, ‘करोना विषाणू ही जागतिक महामारी आहे पण काहींनी त्याचा राजकीय फायद्यासाठी वापर केला. करोनाच्या काळात काँग्रेसने मर्यादा ओलांडली. टीका हे कोणत्याही लोकशाहीचे वैशिष्ट्य असते, पण ‘आंधळा विरोध’ म्हणजे लोकशाहीचा अपमान करण्यासारखे आहे.’ पंतप्रधान म्हणाले, लोक आता तुम्हाला (काँग्रेस) ओळखू लागले आहेत. काहींनी तुम्हाला आधीच ओळखले आहे आणि काही भविष्यात ओळखतील. 50 वर्षे तुम्हाला सत्ताधारी पक्षात बसण्याची संधी मिळाली आहे. मग या दिशेने विचार का होत नाही? नागालँडच्या जनतेने 1988 मध्ये काँग्रेसला शेवटचे मतदान केले होते. ओडिशाने 1995 मध्ये, गोव्यात 1994 मध्ये तुम्हाला मतदान केले. तुम्ही एकहाती खूप काही साध्य केले पण तेव्हापासून गोव्याने तुम्हाला स्वीकारले नाही. पंतप्रधान म्हणाले की हा मुद्दा केवळ निवडणूक निकालांचा नाही. हा त्यांचा हेतू आहे. इतकी वर्षे सत्तेत राहूनही देशातील जनता यांना सतत का नाकारत आहे, असा प्रश्न उपस्थित होत आहे.
