श्रीनगर : पंतप्रधान नरेंद्र मोदी यांनी शनिवारी जम्मू-काश्मीरमधील डोडा येथे निवडणूक रॅलीला संबोधित केले. येथे पंतप्रधान मोदींनी नॅशनल कॉन्फरन्स, पीडीपी आणि काँग्रेसवर जोरदार निशाणा साधला. पीएम मोदी म्हणाले की, ‘यावेळची निवडणूक तीन कुटुंब आणि तरुणांमध्ये आहे.’

पंतप्रधान मोदींच्या भाषणातील 10 मोठ्या गोष्टी-

– पीएम मोदी म्हणाले, ‘तुम्ही आणि मी मिळून एक सुरक्षित आणि समृद्ध जम्मू-काश्मीर बनवू आणि ही मोदींची हमी आहे.’

– विरोधकांवर निशाणा साधत ते म्हणाले, ‘यावेळच्या जम्मू-काश्मीरच्या विधानसभा निवडणुका तीन घराणे आणि जम्मू-काश्मीरच्या तरुणांमध्ये आहेत. एका बाजूला तीन कुटुंबे आणि दुसऱ्या बाजूला माझी जम्मू-काश्मीरची तरुण मुले आणि मुली स्वप्ने घेऊन निघाले आहेत. एक कुटुंब काँग्रेसचे, एक कुटुंब नॅशनल कॉन्फरन्सचे, एक कुटुंब पीडीपीचे आहे. या तिन्ही कुटुंबांनी मिळून तुम्हा लोकांसाठी जे केले ते पापापेक्षा कमी नाही.

– जुन्या दिवसांबद्दल बोलताना पंतप्रधान म्हणाले, ‘तुम्हाला आठवत असेल जेव्हा दिवस मावळताच येथे अघोषित कर्फ्यू लागू केला जायचा. सर्व दुकाने व कामकाज ठप्प व्हायचे. केंद्र सरकारचे गृहमंत्री लाल चौकात जायलाही घाबरत होते, अशी परिस्थिती होती. जम्मू-काश्मीरमध्ये दहशतवाद आता शेवटचे श्वास मोजत आहे.

– नव्या जम्मू-काश्मीरबद्दल बोलताना ते म्हणाले, ‘गेल्या 10 वर्षांत जम्मू-काश्मीरमध्ये झालेला बदल स्वप्नापेक्षा कमी नाही. पूर्वी पोलिस आणि लष्करावर दगडफेक करण्यासाठी वापरल्या जाणाऱ्या दगडांनी नवे जम्मू-काश्मीर तयार होत आहे. हे सर्व तुम्ही केले आहे. तुमचा हा विश्वास पुढे नेत जम्मू-काश्मीर भाजपने तुमच्यासाठी अनेक संकल्प केले आहेत.

– पर्यटन वाढवण्यावर भर देत पीएम मोदी म्हणाले, ‘भाजप असे सरकार बनवणार आहे जे दहशतवादमुक्त आणि पर्यटकांसाठी स्वर्ग असेल. दहशतवाद वाढल्यानंतर चित्रपटांचे लोक येथे येणे बंद झाले, परंतु आता केवळ देशातूनच नव्हे तर जगभरातून चित्रपटांचे शूटिंग करणारे लोक येथे येतात, त्यामुळे आम्ही नवीन चित्रपट धोरण तयार करत आहोत.

– राज्यातील प्रत्येक क्षेत्राला मुख्य प्रवाहाशी जोडण्याबाबत बोलताना ते म्हणाले, ‘आम्ही जम्मू-काश्मीरमधील अस्पर्शित भागांनाही रेल्वेने जोडत आहोत. लवकरच ही ट्रेन दिल्लीहून रामबन मार्गे श्रीनगरला पोहोचणार आहे. रेल्वे मार्गाचे काम पूर्ण झाले आहे, स्थानक तयार आहे आणि चाचण्याही सुरू झाल्या आहेत. लवकरच हा भाग संपूर्ण देशाशी रेल्वेने जोडला जाईल.

– संविधान घेऊन फिरणाऱ्या लोकांवर निशाणा साधत पंतप्रधान मोदी म्हणाले, ‘आजकाल हे लोक संविधान आपल्या खिशात ठेवतात. त्यांना त्याबद्दल आदर नाही, ते फक्त दिखावा करतात. आपले काळे कारनामे लपवण्यासाठी ते असे करतात. वास्तविकता काय आहे हे जम्मू-काश्मीरच्या प्रत्येक मुलाला माहीत आहे.

– तिहेरी तलाक आणि कलम 370 चा संदर्भ देत पंतप्रधान म्हणाले, ‘जेव्हा आम्ही तिहेरी तलाकबद्दल बोललो तेव्हा नॅशनल कॉन्फरन्स, पीडीपी आणि काँग्रेसने विरोध केला होता. हे तुमचे समर्थक नाहीत, ते फक्त स्वतःच्या हिताचा विचार करतात. हे लोक काय बोलत आहेत आणि त्याचा परिणाम काय होईल हे जाणून घेणे तुमच्यासाठी महत्त्वाचे आहे. एनसी, पीडीपी आणि काँग्रेसला कलम 370 परत आणायचे आहे, तुमच्यासाठी याचा अर्थ असा होईल की ही तीन कुटुंबे एकत्र येऊन पुन्हा पहाडी समाजाचे आरक्षण हिरावून घेतील, त्यांचा मतदानाचा हक्क हिरावून घेतील, जर 35A परत आले तर त्यावर जुने निर्बंध लादले जातील. माता-भगिनींचा हक्क जाईल.

– प्रेमाच्या दुकानावरही पीएम मोदींनी खिल्ली उडवली आणि ते म्हणाले, ‘ते संविधानाबद्दल बोलतात आणि द्वेषाच्या दुकानावर ‘प्रेमाच्या दुकाना’चे फलक घेऊन फिरतात.’

– विरोधकांवर निशाणा साधत पीएम मोदी म्हणाले, ‘ते इथे येतात आणि म्हणतात की आम्हाला आणखी 20 जागा मिळाल्या असत्या तर मोदींसह भाजपचे सर्व नेते तुरुंगात गेले असते. हा तुमचा अजेंडा आहे का? 60 वर्षांनंतर जनतेने आम्हाला तीनदा सेवेची संधी दिली, मात्र नेत्यांना तुरुंगात टाकण्यासाठी आम्ही सरकार चालवत नाही. जेव्हा सकारात्मक विचार नसतो तेव्हा त्यांना तुरुंगात टाकण्याशिवाय कोणताही अजेंडा नसतो. द्वेष दाखवण्याशिवाय ते इतर कशाचाही विचार करू शकत नाहीत.

दरम्यान, जम्मू-काश्मीरमध्ये 18 आणि 25 सप्टेंबर आणि 1 ऑक्टोबर अशा तीन टप्प्यांत निवडणुका होणार आहेत. 8 ऑक्टोबरला निवडणुकीचा निकाल जाहीर होणार आहे. 90 जगांसाठी निवडणुक प्रक्रिया पार पडणार आहे.