अहमदाबाद: पंतप्रधान नरेंद्र मोदी यांनी अमेरिकेचे माजी राष्ट्राध्यक्ष डोनाल्ड ट्रम्प यांनी लादलेल्या टॅरिफवर पुन्हा एकदा सडेतोड उत्तर दिले आहे. गुजरातमधील अहमदाबाद दौऱ्यावर असलेल्या पंतप्रधानांनी 5400 कोटी रुपयांच्या विकास प्रकल्पांचे लोकार्पण आणि पायाभरणी केली. यावेळी जनसभेत बोलताना त्यांनी ऑपरेशन सिंदूर, ट्रम्प यांच्या टॅरिफ आणि काँग्रेसवर जोरदार हल्ला चढवला.

पंतप्रधान म्हणाले, “जगात आज आर्थिक स्वार्थाचे राजकारण चालू आहे. प्रत्येकजण आपला फायदा पाहत आहे. आम्ही सर्व काही पाहत आहोत. आमचे सरकार लघु उद्योजक, शेतकरी आणि पशुपालक यांचे नुकसान होऊ देणार नाही. कितीही दबाव आला तरी आम्ही त्याला तोंड देण्यासाठी आपली ताकद वाढवत राहू.” त्यांनी थेट ट्रम्प यांच्या टॅरिफचा उल्लेख न करता सांगितले, “माझ्या देशातील लघु उद्योजक, शेतकरी आणि पशुपालक यांच्यासाठी मी पुन्हा पुन्हा वचन देतो, तुमचे हित माझ्यासाठी सर्वोच्च आहे.”

अमेरिकेचा भारतावर दबाव –
अमेरिका भारतावर आपले कृषी बाजार आणखी खुले करण्याचा दबाव टाकत आहे. याशिवाय, 27 ऑगस्टपासून भारतावर 50 टक्के टॅरिफ लादण्याची घोषणा अमेरिकेने केली आहे. भारताने रशियाकडून तेल खरेदी केल्यानेही अमेरिकेने नाराजी व्यक्त केली आहे, ज्यामुळे दोन्ही देशांमधील तणाव वाढला आहे.

‘स्वदेशी’ला प्राधान्य द्या – पंतप्रधानांचे आवाहन
पंतप्रधानांनी देशवासियांना भारतात बनलेल्या वस्तूंना प्राधान्य देण्याचे आवाहन केले. ते म्हणाले, “मग ती सजावटीची वस्तू असो वा भेटवस्तू, आपण देशात बनलेल्या वस्तूंनाच प्राधान्य द्यावे.” तसेच, व्यापाऱ्यांना परदेशी वस्तू विकण्यापासून परावृत्त करण्याची विनंतीही त्यांनी केली.

दिवाळीपूर्वी मिळणार भेट-
पंतप्रधानांनी सांगितले की, सरकार जीएसटी सुधारणा करत आहे आणि येत्या दिवाळीपूर्वी देशवासियांना मोठी भेट मिळणार आहे. “जीएसटी सुधारणांमुळे लघु उद्योगांना मोठा फायदा होईल आणि अनेक वस्तूंवरील कर कमी होईल. यंदाच्या दिवाळीत व्यापारी असो वा कुटुंबातील सदस्य, सर्वांना आनंदाचा दुप्पट बोनस मिळेल,” असे ते म्हणाले.

ऑपरेशन सिंदूर आणि काँग्रेसवर टीका –
पंतप्रधानांनी ऑपरेशन सिंदूरचा उल्लेख करत काँग्रेसवरही निशाणा साधला. ते म्हणाले, “जगाने पाहिले आहे की आम्ही पहलगामचा बदला कसा घेतला. 22 मिनिटांत सर्व काही साफ केले. गुजरात ही सुदर्शनधारी आणि चरखाधारी दोन मोहनांची भूमी आहे. सुदर्शनधारीने भारताला सैन्याच्या पराक्रमाचे प्रतीक बनवले, तर चरखाधारीने आत्मनिर्भर बनवले. पूर्वी काँग्रेस सरकार दिल्लीत बसून काहीच करत नव्हते, पण आज आम्ही दहशतवाद्यांना आणि त्यांच्या आकांना कुठेही लपले तरी सोडत नाही.”