PM Kisan 21st Installment: केंद्र सरकारच्या महत्त्वाकांक्षी ‘पीएम किसान सन्मान निधी’ योजनेचा २१ वा हप्ता देशभरातील कोट्यवधी शेतकऱ्यांच्या बँक खात्यात जमा करण्यात आला आहे. मात्र, अनेक शेतकरी असे आहेत ज्यांना अद्याप त्यांच्या वाट्याचे २००० रुपये मिळालेले नाहीत. अशा परिस्थितीत त्वरित स्थिती तपासणे (स्टेटस चेक करणे) आणि गरज पडल्यास तक्रार नोंदवणे अत्यंत महत्त्वाचे आहे. किती शेतकऱ्यांना मिळाला लाभ? १९ नोव्हेंबर रोजी पंतप्रधान नरेंद्र मोदी यांनी कोईम्बतूर येथील कार्यक्रमात ९ कोटींहून अधिक शेतकऱ्यांच्या खात्यात तब्बल १८,००० कोटी रुपये थेट हस्तांतरित केले. जर तुम्ही या योजनेचे पात्र लाभार्थी असाल आणि तरीही तुमच्या खात्यात २००० रुपये जमा झाले नसतील, तर तुमचे नाव लाभार्थी यादीत (Beneficiary List) आहे की नाही, हे सर्वप्रथम तपासणे आवश्यक आहे. पैसे अडकण्याची प्रमुख कारणे बहुतांश शेतकऱ्यांचे पैसे न मिळण्याचे प्रमुख कारण e-KYC पूर्ण नसणे हे आहे. जर तुम्ही अद्याप e-KYC केली नसेल, तर हप्ता तुमच्या खात्यात येणार नाही. e-KYC प्रक्रिया पूर्ण होताच, तुम्हाला पुढील हप्त्यासह थकीत राहिलेला हप्ता देखील मिळू शकेल. त्यामुळे, पीएम किसानच्या अधिकृत वेबसाइटवर जाऊन तुमच्या खात्याची स्थिती (Status) त्वरित तपासा. अशाप्रकारे नोंदवा पीएम किसानमध्ये तक्रार तुम्ही योजनेसाठी पात्र असूनही तुम्हाला २००० रुपये मिळाले नसल्यास, तक्रार नोंदवण्यासाठी खालील पर्याय उपलब्ध आहेत: १. ई-मेलद्वारे तक्रार तुमच्या समस्येचे संपूर्ण आणि सविस्तर वर्णन खालील ई-मेल आयडीवर पाठवा: pmkisan-ict@gov.in pmkisan-funds@gov.in २. हेल्पलाइन नंबरवर कॉल करा या हेल्पलाइन नंबरवर कॉल करून तुम्ही थेट प्रतिनिधीशी बोलू शकता: ०११-२४३००६०६ १५५२६१ ३. टोल-फ्री नंबर टोल फ्री क्रमांकावर तक्रार करण्यासाठी डायल करा: १८००-११५-५२६ तुमचा स्टेटस (स्थिती) असा तपासा: १. सर्वप्रथम पीएम किसानच्या अधिकृत वेबसाइट वर जा. २. ‘Beneficiary Status’ हा विभाग उघडा. ३. येथे तुमचा आधार क्रमांक किंवा मोबाइल नंबर वापरून ‘Get Data’ वर क्लिक करा. ४. यामुळे तुम्हाला तुमचे नाव लाभार्थी यादीत आहे की नाही, आणि तुमचे पेमेंट कोणत्या कारणामुळे थांबले आहे, याची माहिती मिळेल. जर तुमची e-KYC पूर्ण असेल आणि नाव यादीत असेल, तर तक्रार नोंदवल्यानंतर तुमचा हप्ता लवकरच जमा होईल, असा विश्वास सरकारने दिला आहे. त्यामुळे, स्टेटस तपासत राहा आणि गरज वाटल्यास वरील हेल्पलाइन क्रमांकांवर संपर्क साधा.
