PM Cares Fund : पीएम केयर्स फंडला आर्थिक वर्ष २०२४-२५ मध्ये मिळणाऱ्या देणगीत मोठी घट झाली आहे. देशांतर्गत देणगी सुमारे ३० टक्क्यांनी कमी होऊन ४७९ कोटी रुपयांवर आली आहे. तर विदेशी देणगीतही १८ टक्क्यांची घट नोंदवली गेली असून, ती ९२.८ लाख रुपये राहिली आहे. दरम्यान, ३१ मार्च २०२५ रोजी पीएम केयर्स फंडाची एकूण शिल्लक ८,४५२ कोटी रुपये झाली आहे. वर्षभरापूर्वी ही शिल्लक ७,१७३ कोटी रुपये होती.

नवीन ऑडिट अहवालानुसार, फंडातील ७,८४६ कोटी रुपये मुदत ठेवींमध्ये ठेवण्यात आले आहेत. तर ६०५ कोटी रुपये बचत बँक खात्यांमध्ये आहेत. आर्थिक वर्ष २०२३-२४ मध्ये फंडाला ६८१.८ कोटी रुपयांचे देशांतर्गत योगदान मिळाले होते. त्याच कालावधीत १.१३ कोटी रुपयांचे विदेशी योगदान मिळाले होते.

पीएम केयर्स फॉर चिल्ड्रनवर कमी खर्च –

आर्थिक वर्ष २०२४-२५ मध्ये पीएम केयर्स फॉर चिल्ड्रन योजनेवर ८७.८ लाख रुपये खर्च करण्यात आले. मागील आर्थिक वर्षात यासाठी १५.३७ कोटी रुपये खर्च झाले होते. २०२४-२५ मधील फंडातून झालेला एकूण भरणा ८७.८५ लाख रुपये होता. मागील वर्षी हा आकडा १५.६ कोटी रुपये होता.

देणगीचा आलेख सातत्याने घसरला –

पीएम केयर्स फंडच्या संकेतस्थळावर उपलब्ध ऑडिट केलेल्या अहवालांनुसार, २०२०-२१ मध्ये स्वेच्छेने मिळणारे देशांतर्गत योगदान ७,१८४ कोटी रुपयांच्या उच्चांकावर होते. त्यानंतर २०२१-२२ मध्ये ते १,८९६ कोटी रुपये, तर २०२२-२३ मध्ये ९०९ कोटी रुपयांवर आले. विदेशी योगदानातही मोठी घट झाली. २०२०-२१ मध्ये ४९५ कोटी रुपये मिळाले होते. पुढील दोन वर्षांत हे योगदान अनुक्रमे ४० कोटी आणि २.५७ कोटी रुपयांवर आले. आता ते ९२.८ लाख रुपये राहिले आहे. २०१९-२० मधील ३९.७ लाख रुपयांनंतर हा दुसरा सर्वात कमी आकडा आहे.

पीएम केयर्स फंडाची स्थापना का झाली?

कोरोना महामारीसह कोणत्याही आपत्कालीन किंवा संकटाच्या परिस्थितीत मदत करण्याच्या उद्देशाने केंद्रातील नरेंद्र मोदी सरकारने पीएम केयर्स फंडची स्थापना केली. हा सार्वजनिक धर्मादाय ट्रस्ट म्हणून नोंदणीकृत आहे. पंतप्रधान हे या फंडाचे पदसिद्ध अध्यक्ष आहेत. फंडाला सरकारी अर्थसंकल्पातून निधी मिळत नसून तो पूर्णपणे स्वेच्छेच्या योगदानावर चालतो.

ऑक्सिजन प्लांट आणि व्हेंटिलेटरसाठी निधी –

कोरोना काळात पीएम केयर्स फंडातून ऑक्सिजन प्लांट उभारणे आणि व्हेंटिलेटर खरेदी करण्यासाठी निधी देण्यात आला. केंद्र आणि राज्य सरकारच्या रुग्णालयांमध्ये ही कामे करण्यात आली. २०२१-२२ मध्ये प्रेशर-स्विंग अॅडसॉर्प्शन ऑक्सिजन प्लांटसाठी १,७०३ कोटी रुपये, तर व्हेंटिलेटरसाठी ८३५ कोटी रुपये खर्च करण्यात आले. एकूण खर्च सुमारे १,९३८ कोटी रुपये होता.