फरिदाबाद : अयोध्येतील राम मंदिर उडवण्याचा कट उधळण्यात यश आले आहे. गुजरात आणि हरियाणा एटीएस टीमने अटक केलेल्या एका संशयित दहशतवाद्याच्या चौकशीतून हा खुलासा झाला आहे. गुजरात एटीएस आणि पलवल एसटीएफने संशयिताला फरिदाबाद येथून अटक केली आहे. अटक केलेल्या आरोपीचे नाव अब्दुल रहमान आहे. तो उत्तर प्रदेशातील फैजाबाद जिल्ह्यातील (आता अयोध्या) रहिवासी आहे. दहशतवाद्याने दिलेल्या माहितीनंतर, लपवलेले दोन ग्रेनेड सुरक्षा यंत्रणांनी जप्त केले आहेत. गुजरात एटीएसने दहशतवाद्याचा फोटोही जारी केला आहे. गुजरात एटीएसला अशी माहिती मिळाली होती की एक संशयित व्यक्ती मोठी घटना घडवण्याचा कट रचत आहे आणि तो सध्या फरिदाबादमध्ये आहे. यानंतर, गुजरात एटीएस हरियाणातील फरिदाबादला रवाना झाले, जिथे त्यांनी फरिदाबाद एसटीएफची मदत घेतली. त्यानंतर संयुक्त कारवाई करत रविवारी संशयिताला अटक केली. एटीएस टीम संशयिताला घेऊन गुजरातला गेली आहे. मिळालेल्या माहितीनुसार, त्याला राम मंदिरावर हल्ला करण्यासाठी आयएसआयने प्रशिक्षण दिले होते. त्याला दोन हँडग्रेनेड दिले होते, जे तो अयोध्येत घेऊन जाऊ इच्छित होता. त्याने हे ग्रेनेड एका ठिकाणी लपवले होते. त्याच्याकडून अनेक संशयास्पद व्हिडिओ देखील सापडले आहेत, ज्यात देशातील प्रमुख धार्मिक स्थळांची माहिती होती. अटक केलेल्या दहशतवाद्याचे वय फक्त १९ वर्षे आहे.
