पिंपरी :  पिंपरी चिंचवड महापालिका हद्दीतील पथारी, स्टॉल धारकांचे सर्वेक्षण पूर्ण झाले असून त्यांना परवाना देण्यासाठी फॉर्म भरून घेतले आहेत. तरीदेखील महापालिकेच्या अतिक्रमण विभागाकडून पथारीधारकांवर होणारा त्रास अन्यायकारक आहे. यामध्ये काही स्टॉलधारक दिव्यांग आहेत. अशा दिव्यांग स्टॉलधारकांचे प्रश्न प्राधान्यक्रमाणे सोडवणार, असे आश्वासन कष्टकरी व फेरीवाला क्रांती महासंघाचे अध्यक्ष कामगार नेते काशिनाथ नखाते यांनी दिले.

भोसरीमधील महासैनिक औद्योगिक वसाहत येथे आयोजित अपंग (दिव्यांग)सहारा संस्थेच्या जनसंपर्क कार्यालयाचे उद्घाटन स्थायी समितीचे माजी अध्यक्षअजित गव्हाणे यांच्या हस्ते करण्यात आले. यावेळी उडान दिव्यांग फाउंडेशनचे आनंद बनसोडे,अल्टीग्रीन ऑटोमोबाईल कंपनीचे वैभव पाटील, अपंग (दिव्यांग)सहारा संस्थेचे अध्यक्ष अशोक सोनावणे, किरण साडेकर, रणरागिणी महिला लघु उद्योग सोशल फाउंडेशनच्या सरोन कुचेकर, उपाध्यक्ष गणेश तेली, खजिनदार संजीवनी सिरसाट,सचिव नानासाहेब डाडर यांच्यासह दिव्यांग बांधव उपस्थित होते.

यावेखळी अजित गव्हाणे म्हणाले की, दिव्यांग बांधव कोणत्याही स्वरूपामध्ये आलेल्या दिव्यांगत्वावर निराश न होता जिद्दीनं, ताकतीन उभे आहेत त्यांच्या जिद्दीला सलाम करण्याची गरज आहे. दिव्यांगांना कुणाची भीक नको तर संधी देण्याची गरज आहे.

या कार्यक्रमात मिनिता पाटील (कला), नंदकुमार फुले (प्रशासकीय), प्रकाश मोहारे (क्रीडा), धर्मेंद्र सातव व शिवाजी भेगडे (दिव्यांग कल्याण) यांना विविध क्षेत्रातील उल्लेखनीय कार्याबद्दल सन्मानित करण्यात आले. हरिदास शिंदे यांनी सूत्रसंचालन केले.