प्रभात वृत्तसेवा
भोसरी – पिंपरी-चिंचवडमधील महत्वाचा नाशिक रोड हा रोज लाखो वाहनांची वाहतूक सांभाळतो. या मार्गावरील जय गणेश साम्राज्य चौक हा परिसर गेल्या अनेक दिवसांपासून वाहतूक कोंडीमुळे नागरिकांच्या डोकेदुखीचा विषय ठरला आहे. चौकातील सिग्नल अनेकदा बंद पडलेले असतात, तर रस्त्याचे रुंदीकरण अद्याप रखडलेले असल्याने वाहनांच्या रांगा तासनतास लांबणीवर जातात. यामुळे कार्यालयीन कर्मचारी, व्यावसायिक तसेच रुग्णवाहिका सेवांनाही मोठा त्रास सहन करावा लागत आहे.

सकाळी ऑफिसची वेळ आणि सायंकाळी घरी परतण्याच्या वेळेत या चौकात अक्षरशः गाड्यांचा महापूर उसळतो. चारचाकी, दुचाकी, मालवाहतूक ट्रक, टेम्पो, पीएमटी बस अशा सर्वच वाहनांचा या चौकात एकत्रित ताण पडतो. सिग्नलचे योग्य नियोजन नसल्याने आणि सिग्नल बंद पडल्याने चालक मनमानी पद्धतीने गाड्या पुढे नेतात. परिणामी अपघातांची शक्यता सतत डोकावत असते. नागरिकांना थांबून राहावे लागते आणि मौल्यवान वेळ वाया जातो.

रुग्णवाहिकांनाही मार्ग काढणे कठीण..
वाहतूक पोलिसांचेही या ठिकाणी योग्य व्यवस्थापन नसल्याने कोंडी आणखीनच गंभीर होते. अनेकदा अॅम्ब्युलन्सना देखील या चौकातून मार्ग काढणे कठीण होते. काही वेळा तर रुग्णवाहिका तासभर थांबलेल्या दिसून आल्या आहेत. यावरून प्रशासनाच्या निष्क्रियतेचे दर्शन घडते.

रुंदीकरण आणि अतिक्रमण..
रस्त्याचे रुंदीकरण अनेक वर्षांपासून चर्चेत असले तरी कामाची गती अत्यंत संथ आहे. पथकांकडून सर्वेक्षण, योजना, निविदा प्रक्रिया सुरू असल्याचे सांगण्यात येते, मात्र प्रत्यक्षात काम सुरू होताना दिसत नाही. रस्त्यालगतचे काही अतिक्रमण अद्याप हटवण्यात आलेले नाही. यामुळे रुंदीकरण लांबणीवर गेले असून, नागरिकांचा संयम संपत चालला आहे.

आर्थिक फटका..
या वाहतूक कोंडीमुळे आर्थिक नुकसानही होत आहे. गाड्यांचा इंधन खर्च वाढतो, तर उशीर झाल्याने उद्योग क्षेत्रातील उत्पादकतेवर परिणाम होतो. व्यापारी वर्गालाही माल पोचवण्यात अडथळे निर्माण होतात. प्रवाशांच्या दैनंदिन जीवनातील त्रास तर वेगळाच. स्थानिक नागरिक आणि सामाजिक संघटनांनी अनेकदा महापालिका आणि वाहतूक विभागाला लेखी निवेदनं दिली आहेत. तरीही ठोस उपाययोजना होताना दिसत नाही. प्रशासनाने आता तात्काळ पुढाकार घेत सिग्नल व्यवस्थित दुरुस्त करणे, वाहतूक पोलिसांची योग्य तैनाती करणे आणि रस्त्याचे रुंदीकरण तातडीने हाती घेणे आवश्यक आहे. अन्यथा येत्या काळात हा चौक अपघातप्रवण ठरू शकतो.

कारणे..
-अनेकदा सिग्नल यंत्रणा बंद
-रुंदीकरण रखडले
-अतिक्रमण हटविण्यात उदासीनता
-वाहतूक पोलिसांचे दुर्लक्ष