पिंपरी : कृत्रिम बुद्धिमत्तेचा वापर करुन अनधिकृत जाहिरात फलकावर नियंत्रण ठेवण्याकरीता एक चांगली यंत्रणा तयार केली आहे. नागरिकांनी अधिकृत जागेवरच जाहिरात फलक लावले पाहिजे. एखाद्या अनधिकृत फलकावर माझी जाहिरात असेल, तरी पहिल्यांदा हटवा, म्हणजे इतरांची होडिर्ंंग काढायला कोणतीही अडचण राहणार नाही, अशी सूचना मुख्यमंत्री देवेंद्र फडणवीस यांनी महापालिका आयुक्त शेखर सिंह यांना केली. यावेळी फडणवीस म्हणाले, सर्वच राजकीय पक्षांचे पदाधिकारी अनधिकृत होर्डिंग्ज लावतात. मात्र कृत्रिम बुद्धीमत्तेच्या माध्यमातून अशा अनधिकृत होडिंग्जवर लक्ष ठवता येईल, ही चांगली गोष्ट आहे. ज्यांना होर्डिंग लावायचे त्यांनी अधिकृत ठिकाणी लावावेत. महापालिकेच्या इतर उपक्रमांबाबत फडणवीस म्हणाले, पिंपरी-चिंचवड महापालिकेने शहरात विविध चांगले प्रकल्प हाती घेतले असून नागरिकांना याचा लाभ होणार आहे. प्रशासनात लोकाभिमुखता, पारदर्शकता आणून नागरिकांना उत्तरदायी प्रशासन सिटी हब फॉर डेटा अँड कम्युनिकेशन (सीएचडीसी) च्या माध्यमातून निर्माण होण्यास मदत होणार आहे. पिंपरी चिंचवड पोलीस आयुक्तालयाकडे असलेल्या जागेबाबत महापालिकेसोबत बैठक लावून जागेबाबतचा निर्णय घेण्यात येईल. त्या जागेवर आधुनिक शहराला पूरक अशा बाबी करण्यात येईल. महापालिकेच्या फायर स्टेशनबाबत ते म्हणाले की, अमेरिकासारख्या प्रगत देशातील कॅलिफोर्नियामध्ये आग लागल्यानंतर फायर ब्रिगेडकडे दुर्लक्ष केल्याने आगीवर नियंत्रण मिळविण्यासाठी अनेक अडचणींचा सामना करावा लागला. आपल्यापैकी अनेकांना वाटते आग एकदाच लागते मात्र तयारी वर्षभर करावी लागते.त्यामुळे सुसज्ज फायर स्टशन सुरू करणे आवश्यक आहे. त्याकरिता फायर स्टेशनच्या आरक्षणात कोणताही बदल करू नका, अशी सूचनाही फडणवीस यांनी केली.
