पिंपरी : नागरिकांची कामे जलदगतीने पूर्ण करण्यासाठी पिंपरी-चिंचवड महापालिकेकडून राज्य सरकारने ठरवून दिलेल्या शंभर दिवसांच्या कार्यक्रमाची अंमलबजावणी केली जात आहे. पालिकेच्या सेवा ऑनलाईन करणे, वेळेत तक्रारींचे निवारण करणे, कामे मुदतीत करणे, असे निर्देश महापालिका आयुक्त तथा प्रशासक शेखर सिंह यांनी पालिकेच्या सर्व विभागप्रमुखांना दिले आहेत.

राज्य शासनाच्या निर्देशानुसार महापालिका प्रशासनाने हा कार्यक्रम निश्चित केला आहे. त्याप्रमाणे अंमलबजावणी करण्याचे परिपत्रक आयुक्त सिंह यांनी काढले आहे. यामध्ये नागरी सुविधा देण्यासाठी कार्यालयीन कामकाज कमीत कमी वेळेत पूर्ण करावे. अधिकार्‍यांनी नागरिकांच्या भेटीसाठी निश्चित वेळ ठरवून द्यावी. नागरिकांच्या तक्रारींचे जलद निवारण करावे. शहरात उद्योग सुरू करू इच्छिणार्‍या उद्योजकांना सर्वतोपरी सहकार्य करावे. त्यांच्यासाठी आखण्यात आलेल्या धोरणांची अमलबजावणी करावी. केंद्र व राज्यस्तरीय योजनांची अंमलबजावणी करावी.

महापालिकेचे संकेतस्थळ सुसज्ज करण्यात यावे. सर्वसामान्यपणे उपलब्ध असलेली जी माहिती नागरिक माहिती अधिकाराचा वापर करून विचारतात. ती माहिती विभागांनी पारदर्शकपणे संकेतस्थळावर उपलब्ध करून द्यावी. जास्तीत जास्त सेवा ऑनलाईन कराव्यात. यासह सायबर सुरक्षेबाबत नागरिकांना हमी द्यावी. सार्वजनिक वाहतूक सुविधा सक्षमीकरण करावी.

पीएमपीएल बस, रेल्वे, मेट्रो सेवांची वारंवारिता व नेटवर्क सुधारावे. यासह तक्रार निवारण दिन, लोकशाही दिन, अधिकारी व नागिरक यांच्या संवाद, एक खिडकी उपक्रम राबवावा. कर्मचार्‍यांसाठी तक्रार निवारण दिन घ्यावा. पालिका मुख्यालयासह सर्व कार्यालयांमध्ये स्वच्छता मोहीम राबवून अनावश्यक गोष्टी, रद्दी काढून टाकाव्यात. शहरात सौंदर्यीकरण करावे, असे आदेश आयुक्तांनी दिले आहेत.

शाळा, अंगणवाडी, दवाखान्यांची पाहणी करा
येणा-या शंभर दिवसांत शाळा, प्राथमिक आरोग्य केंद्र, अंगणवाड्यांची तपासणी करावी. त्यांना पुरविण्यात येणार्‍या शिक्षण व आरोग्यविषयक सुविधांची पाहणी करावी. शाळांमध्ये शिक्षकांची कमतरता, शिक्षणाची गुणवत्ता, शालेय सुविधा तपासावी. तर, आरोग्य केंद्रात डॉक्टरची उपलब्धता, औषधांची गरज, अंगणवाडीतील बालकांचे पोषण, शिक्षण आणि आरोग्याचा आढावा घेतला जावा, असे आदेश आयुक्त शेखर सिंह यांनी संबंधित विभागप्रमुखांना दिले आहेत.