वडगाव मावळ : पुणे शहर व पुणे ग्रामीण पोलीस हद्दीतील काही पोलीस ठाणी मिळून १५ ऑगस्ट २०१८ रोजी स्वतंत्र पिंपरी-चिंचवड पोलीस आयुक्तालयाची निर्मिती झाली. त्यावेळी पुणे ग्रामीण पोलीस हद्दीतील देहूरोड, तळेगाव दाभाडे, तळेगाव एमआयडीसी, चाकण, आळंदी ही महत्वाची पोलीस ठाणी आयुक्तालयाला जोडण्यात आली. यानंतर आता मावळ तालुक्यातील वडगाव मावळ, कामशेत, लोणावळा शहर व लोणावळा ग्रामीण ही चारही ठाणी आयुक्तालयाला जोडण्याचा प्रस्ताव पाठविण्यात आला असल्याची माहिती समोर आली आहे.

मावळ तालुक्यातील ही चारही ठाणी पिंपरी – चिंचवड आयुक्तालयाला जोडल्यास पुणे ग्रामीण पोलीस हद्दीत अवघी ३० ठाणी राहतील. दरम्यान मावळातील या चारही पोलीस ठाण्यांना पिंपरी-चिंचवड आयुक्तालयाला जोडण्याचा प्रस्ताव गृह विभागाला पाठविल्याची माहिती समोर आल्यानंतर संबंधित ठिकाणच्या राजकीय नेत्यांनी व नागरिकांनी प्रस्तावाला तीव्र विरोध दर्शविला आहे.

पूर्वीपासून वडगाव, कामशेत, लोणावळा शहर व लोणावळा ग्रामीण ही चार पोलीस ठाणी पुणे ग्रामीण पोलीस दलाच्या हद्दीत असून ग्रामीण पोलिसांनी आपले कर्तव्य बजावित गुन्हेगारी मोडीत काढली आहे. आयुक्तालयातील पोलीस खात्याचा कारभार पाहता कार्यक्षेत्रात गुन्हेगारी वाढत चाललेली दिसते. तळेगाव दाभाडे व देहूरोड शहरांत गुन्हेगारीचा आलेख वाढला आहे. ग्रामीण भागांतील नागरिकांना ग्रामीण पोलीस दल न्याय देऊ शकते. यामुळे ही चारही ठाणी पुणे ग्रामीण पोलीस दलाकडे राहावी, आयुक्तालयाला ही ठाणी जोडण्याचा प्रस्ताव मंजूर केल्यास आम्ही तीव्र आंदोलन करू.
– सूर्यकांत वाघमारे, प्रदेश सचिव, आरपीआय (आठवले)

वडगाव मावळ, कामशेत, लोणावळा शहर व लोणावळा ग्रामीण या चार पोलीस ठाण्यांना पिंपरी-चिंचवड आयुक्तालयाशी जोडण्यास नागरिकांसह विविध राजकीय पक्षांच्या नेत्यांनी विरोध दर्शविला असून ही चारही ठाणी पुणे ग्रामीण पोलीस दलाच्या हद्दीतच राहावी, अशी मागणी केली आहे. तसेच असा कोणताही प्रस्ताव मंजूर झाल्यास तीव्र आंदोलनाचा इशारा दिला आहे.