पिंपरी – पिंपरी-चिंचवड परिसरातील वाहतूक कोंडी कमी करण्यासाठी प्रस्तावित इनर रिंग रोडच्या भूसंपादन प्रक्रियेला वेग येत आहे. मुळशी, मावळ आणि हवेली तालुक्यांतील गावांमध्ये जमीन मोजणीपूर्व बैठका घेण्यात येत आहे. मुळशीतील चार गावांमध्ये मोजणीच्या तारखा निश्चित झाल्या आहेत.

प्रस्तावित इनर रिंग रोडची रुंदी ६५ मीटर असून, रस्त्याच्या दोन्ही बाजूंना प्रत्येकी नऊ मीटरचे सेवा रस्ते उभारण्याचे नियोजन आहे. या प्रकल्पासाठी बाधित होणाऱ्या शेतकऱ्यांच्या शंका दूर करून त्यांना भूसंपादन प्रक्रिया आणि मोबदल्याबाबत माहिती दिली जात आहे.

मुळशी तालुक्यातील हिंजवडी येथे १२ ऑक्टोबर, जांबे येथे १३ ऑक्टोबर, मारुंजी येथे १५ ऑक्टोबर आणि नांदे येथे १७ ऑक्टोबर २०२६ रोजी जमीन मोजणी होणार आहे. हवेली तालुक्यातील मांजरी खुर्द येथे १३ ऑक्टोबरपासून, तर कोलवडी येथे १५ ऑक्टोबरपासून मोजणीचे नियोजन करण्यात आले आहे. माण आणि नेरे येथील ग्रामस्थांशीही प्रशासनाचा संवाद सुरू आहे. कोलवडी येथे झालेल्या बैठकीत शेतकऱ्यांनी बाजारभावानुसार मोबदला देण्याची मागणी केली.

भूसंपादन उपजिल्हाधिकारी विठ्ठल उदमले यांनी शेतकऱ्यांच्या अडचणी जाणून घेतल्या. मोजणी पूर्ण झाल्यानंतर बाधित क्षेत्र निश्चित केले जाईल. त्यानंतर घरे, झाडे, विहिरी, कूपनलिका आणि पाइपलाइन यांचे पंचनामे करण्यात येतील. मागील तीन वर्षांतील जमीन खरेदी-विक्री व्यवहारांची माहिती घेऊन मोबदल्याचे मूल्यांकन केले जाणार आहे.

शेतकऱ्यांवर अन्याय होणार नाही, याची काळजी घेतली जाईल, अशी ग्वाही प्रशासनाने दिली आहे. मावळ तालुक्यातील धामणे येथेही ग्रामस्थांसोबत बैठक घेऊन त्यांच्या मागण्या जाणून घेण्यात आल्या. पीएमआरडीएने डिसेंबरअखेर भूसंपादन प्रक्रिया पूर्ण करण्याचे उद्दिष्ट ठेवले आहे. हा प्रकल्प पूर्ण झाल्यानंतर पिंपरी-चिंचवड परिसरातील वाहतूक कोंडी कमी होण्यास मदत होईल, अशी अपेक्षा प्रशासनाने व्यक्त केली आहे.

Pune : सह्याद्रीत रंगणार 120 किमीची साहसी शर्यत; सायकलिंगपासून कयाकिंगपर्यंत सात आव्हानांचा थरार