प्रभात वृत्तसेवा पिंपरी – चकना सेंटर चालवणाऱ्या तरुणाला धमकी देऊन, त्याच्यावर चाकूने वार करण्यात आले. तसेच त्याच्या दोन मित्रांना मारहाण करून गंभीर जखमी करण्यात आले. आरोपींमध्ये एका महिलेचा देखील समावेश आहे. ही घटना शनिवारी (दि. १८) सायंकाळी ओरा हॉटेल समोर, कुदळवाडी ब्रिज, चिखली येथे घडली.आदित्य कैलास बालटकर (वय २३, रा. घरकुल, चिखली), साहिल गावडे, हनुमंत सोडनर अशी जखमींची नावे आहेत. याप्रकरणी आदित्य यांनी रविवारी (दि. १९) चिखली पोलीस ठाण्यात फिर्याद दिली आहे. त्यानुसार साहिल शेख (चिंचवड), महिला आरोपी (चिंचवड), केशव मोती विश्वकर्मा (वय २५, रा. रहाटणी), वकील मस्जिद खान (वय २०, रा. चिंचवड) आणि त्यांचे चार ते पाच साथीदारांवर गुन्हा दाखल केला आहे. फिर्यादी आदित्य आणि त्यांचा मित्र साहिल गावडे चकना विकत असताना आरोपी महिला तिथे आली. “तू यहा स्नॅक्स सेंटर कैसा चलाता है मै देखती” असे म्हणत चकना सेंटर बंद करण्याची धमकी दिली. तिने तिचा मुलगा सोहेल शेख याला बोलावले. आरोपी केशव आणि वकील यांनी येऊन आदित्य यांना दगडाने मारहाण केली. तर महिलेने चाकूने वार केले. त्यानंतर आरोपींनी फिर्यादी आणि त्यांच्या दोन मित्रांना मारहाण करून जखमी केले. पोलिसांनी केशव आणि वकील या दोघांना अटक केली आहे.
