प्रभात वृत्तसेवा पिंपरी – क्रेन बाजूला घेण्याच्या कारणावरून झालेल्या वादातून ३२ जणांच्या टोळक्याने क्रेन चालक आणि क्रेन मालकासह दोघांवर हल्ला केला. ही घटना चिखलीतील कुदळवाडी येथे बुधवारी (दि. १५) सायंकाळी घडली.याकुब हाजी सय्यदखान (वय ५४, रा. पुर्णानगर, चिंचवड) यांनी गुरुवारी (दि. १६) चिखली पोलीस ठाण्यात फिर्याद दिली आहे. त्यानुसार जावेद रेहमानी, जुनेद रेहमानी, अली रेहमानी, परवेझ रेहमानी, आलम रेहमानी, अक्तर रेहमानी आणि इतर २० ते २५ जणांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी यांचा क्रेन चालक रेहमान खान याची आणि टेम्पो चालक ललावू रेहमानी यांच्यात क्रेन साईडला घेण्यावरून वाद झाला. त्यातून टेम्पो चालकाने आपले साथीदार बोलावून फिर्यादींच्या क्रेन चालकाला शिवीगाळ आणि मारहाण केली. वाद मिटवण्यासाठी फिर्यादींचा मुलगा हैदर खान आणि इम्रान खान तेथे आले असता त्यांनाही मारहाण करण्यात आली. नंतर राग धरून आरोपींनी हातात लाकडी दांडके आणि कोयते घेऊन येत जीवे मारण्याची धमकी दिली. आरोपींनी क्रेनच्या काचा फोडून नुकसान केले. चिखली पोलीस याबाबत अधिक तपास करीत आहेत.
