प्रभात वृत्तसेवा पिंपरी – एका ॲपच्या माध्यमातून शेअर ट्रेडिंगमध्ये १० ते १५ टक्के रोज खात्रीशीर नफा देण्याचे आमिष दाखवून एका व्यक्तीची तब्बल १ कोटी ५८ लाख ९ हजार ४३१ रुपयांची आर्थिक फसवणूक करण्यात आली. ही घटना ३ एप्रिल ते १६ जून या कालावधीत चिंचवड येथे घडली.या प्रकरणी ४३ वर्षीय व्यक्तीने गुरुवारी (दि. २५) सायबर पोलीस ठाण्यात फिर्याद दिली आहे. त्यानुसार सुदर्शन रवी कुमार, स्वाती देशपांडे, दिवाकर आणि दहा बँक खाते धारकांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, आरोपींनी फिर्यादी यांना एका ऍप युआरएलच्या माध्यमातून शेअर ट्रेडिंगमध्ये १० ते १५ टक्के रोज खात्रीशीर प्रॉफिट देण्याचे आमिष दाखवले. विश्वास संपादन करून, त्यांनी फिर्यादीस वेगवेगळया बँक खात्यांमध्ये एकूण १ कोटी ५८ लाख ९ हजार ४३१ रुपये गुंतवणूक करण्यास भाग पाडले. फिर्यादीने गुंतवलेल्या रकमेवर ८ कोटी रुपये एवढा मुद्दल व नफा असल्याचे आमिष दाखवले. परंतु, गुंतवणूक केलेली रक्कम व नफा काढण्याचा प्रयत्न केला असता आरोपींनी फिर्यादीकडे एकूण जमा रकमेच्या २.८२ टक्के चार्जेसची मागणी करून फिर्यादीची आर्थिक फसवणूक केली. सायबर पोलीस याबाबत अधिक तपास करत आहेत.
