प्रभात वृत्तसेवा पिंपरी – दोन कारमधून राज्यात गांजाची वाहतूक करून विक्रीसाठी आणणाऱ्या टोळीवर अंमली पदार्थविरोधी पथकाने धाड टाकत ५५ किलो ५७५ ग्रॅम गांजा जप्त केला. ही कारवाई २६ डिसेंबर रोजी पिंपरीतील जुन्या मुंबई–पुणे महामार्गावर करण्यात आली.नुरमोहमद शिराजउद्दीन शेख (वय २९, रा. फुलेनगर, चिखली), मोहियोद्दीन लियाकत कुरेशी (वय ३०, रा. चिंचवड) तसेच दोन महिलांना अटक करण्यात आली. अंमली पदार्थविरोधी पथकातील पोलीस हवालदार किशोर विठ्ठल परदेशी यांनी शुक्रवारी (दि. २६) पिंपरी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गुप्त माहिती मिळाल्यानंतर पथकाने प्रिस्टाईन कन्स्ट्रक्शनजवळ संशयित गाड्यांना थांबविले. झडतीदरम्यान दोन्ही कारमध्ये ४२ लाखांपेक्षा अधिक किमतीचा गांजा, रोकड, मोबाइल फोन असा मुद्देमाल सापडला. प्राथमिक चौकशीत आरोपींनी गांजा ओरिसा येथून आणल्याची कबुली दिली आहे. इतर दोन संशयित कुमार विशाल व रपेश मुलुक यांच्याही सहभागाची शक्यता व्यक्त करण्यात आली असून ते फरार आहेत.
