प्रभात वृत्तसेवा पिंपरी – गुगल मॅपवरून उच्चभ्रू हाउसिंग सोसायट्यांचे लोकेशन शोधून घरफोडी करणाऱ्या राजस्थान आणि मध्य प्रदेशातील दोन सराईत चोरट्यांना पिंपरी-चिंचवड गुन्हे शाखा युनिट दोनच्या पथकाने बेड्या ठोकल्या. चोरट्यांनी गुगलच्या मदतीने शहरातील घरांची ‘रेकी’ करत सोन्याचे दागिने लंपास केले होते.आनंदसिंह पर्वतसिंह सरदार (वय २२, रा. राजस्थान), गुरुदीप आनंदसिंह सिगलीकर (वय २०, रा. रतलाम, मध्य प्रदेश) अशी अटक केलेल्यांची नावे आहेत. पोलीस उपायुक्त डाॅ. शिवाजी पवार यांनी दिलेल्या माहितीनुसार, २९ सप्टेंबरला जुनी सांगवी येथे घरफोडी करून चोरट्यांनी सोन्याचे व चांदीचे दागिने चोरून नेले. याप्रकरणी सांगवी पोलीस ठाण्यात गुन्हा दाखल झाला होता. गुन्ह्याचे गांभीर्य लक्षात घेऊन पोलीस आयुक्त विनय कुमार चौबे यांनी गुन्ह्याचा तपास युनिट दोनकडे वर्ग केला.पोलीस उपायुक्त डॉ. शिवाजी पवार, सहायक आयुक्त विशाल हिरे यांच्या मार्गदर्शनाखाली वरिष्ठ पोलीस निरीक्षक अरविंद पवार, उपनिरीक्षक भारत गोसावी, मयुरेश साळुंखे, सहायक उपनिरीक्षक प्रवीण दळे, संजय गवारे, नितीन ढोरजे, पोलीस अंमलदार कृणाल शिंदे, मोहम्मद गौस नदाफ, भाऊसाहेब राठोड, प्रशांत सैद, रवी पवार, अमर राणे यांच्या पथकाने ही कामगिरी केली. शंभरहून अधिक सीसीटीव्हींची तपासणी.. युनिट दोनच्या पथकाने कसून तपास सुरू केला. पोलिसांनी घटनास्थळाजवळील परिसरातील १०० ते १२० सीसीटीव्ही कॅमेरे तपासले. त्यात एका मोटारसायकलवरून संशय वाढला. ती मोटारसायकलही चोरीची असल्याचे समोर आले. त्यानंतर तांत्रिक विश्लेषण आणि मोबाइल लोकेशनच्या आधारे पोलिसांना संशयितांचा माग राजस्थान आणि मध्य प्रदेशपर्यंत लागला. राजस्थान–मध्य प्रदेशात सापळा.. पोलीस उपनिरीक्षक भारत गोसावी, मयुरेश साळुंखे, पोलीस अंमलदार मोहम्मद गौस नदाफ, कुणाल शिंदे, रवी पवार यांनी विशेष पथकासह डुंगरपूर (राजस्थान) व रतलाम (मध्य प्रदेश) येथे सापळा रचून दोन संशयितांना ताब्यात घेतले. दोघांनी चौकशीत गुन्ह्याची कबुली दिली असून त्यांच्याकडून तीन लाख ६० हजारांचे सोन्याचे दागिने आणि चोरीस गेलेली मोटारसायकल जप्त केली. लाॅजमध्ये मुक्काम.. सराईत दोन्ही संशयित परराज्यांतून बसने महाराष्ट्रात येत असत. लॉजमध्ये खोट्या आधारकार्डच्या आधारे राहात असत. त्यानंतर गुगल मॅपवर उच्चभ्रू हाउसिंग सोसायट्या शोधून घरफोडी करत असत.
