वडगाव मावळ : मावळवासीयांच्या आरोग्यसेवेला अधिक सक्षम करण्यासाठी आंबी येथे उभारण्यात आलेले ‘पुष्पलता डी. वाय. पाटील हॉस्पिटल’ लवकरच सुरु होणार आहे. या रुग्णालयास आमदार सुनील शेळके यांनी भेट दिली आणि हा प्रकल्प मावळवासीयांच्या आरोग्यसेवेच्या दृष्टिकोनातून अत्यंत महत्त्वाचा ठरेल, असा विश्वास व्यक्त केला.

वडगाव-कान्हे आणि लोणावळा येथील उपजिल्हा रुग्णालयांप्रमाणेच, हे नवीन आणि सुसज्ज हॉस्पिटल मावळमधील नागरिकांच्या सेवेसाठी लवकरच खुले होणार आहे, ही आनंदाची बाब आहे, असे आमदार शेळके यांनी भेटी दरम्यान सांगितले. या अत्याधुनिक रुग्णालयात रुग्णांसाठी तब्बल ६५० बेड्सची सोय असणार आहे.

यासोबतच, येथे ९ सुपर स्पेशालिटी ऑपरेशन थिएटर्स, ६४ अत्याधुनिक आयसीयू बेड्स आणि नवजात शिशूंसाठी १० एनआयसीयू बेड्स उपलब्ध असतील. याव्यतिरिक्त, रुग्णांना डायलिसिस सेंटर, सिटी स्कॅन आणि एम.आर.आय. सारख्या महत्त्वाच्या सुविधाही येथे मिळणार आहेत.

या रुग्णालयाचा सर्वात महत्त्वाचा भाग म्हणजे येथे महात्मा ज्योतिबा फुले जन आरोग्य योजना, आयुष्मान भारत योजना आणि इतर शासकीय आरोग्य योजना लागू असणार आहेत. त्यामुळे मावळ भागातील गरीब आणि गरजू नागरिकांना मोफत तसेच सुलभ उपचार घेणे शक्य होणार आहे. डॉ. विजय पाटील यांच्या संकल्पनेतून साकारलेले हे हॉस्पिटल आरोग्यसेवेच्या क्षेत्रात एक नवीन मापदंड स्थापित करेल, असा विश्वास आमदार शेळके यांनी व्यक्त केला.