पिंपरी – आयोध्येमध्ये सोमवारी (दि. २२) एतिहासिक श्रीराम प्रतिष्ठापना सोहळा होणार आहे. त्यामिनित्त घरोघरी अक्षतांचे वाटप झाले आहे. तर, मंदिरांमध्ये स्वच्छता करण्यात आली असून मंदिरे सजली आहे. तसेच शहरात श्रीरामाचे चित्र, फोटो, मुद्रा असलेले भगवे ध्वज लहरत आहेत. त्यामुळे शहरातील संपूर्ण वातावरण भगवे, श्रीराममय झाले आहे. प्रभू श्री रामचंद्र की, जय, असे फलक शहरात झळकत आहेत. बाजारपेठांही विविध वस्तूंनी सजल्या आहेत. शहर सोहळ्यासाठी सज्ज झाले आहे.

आयोध्येमध्ये सोमवारी (दि. २२) होणारा हा सोहळा एतिहासिक करण्यासाठी संपूर्ण देशभर विविध कार्यक्रमांचे आयोजन करण्यात आले आहे. त्यात पिंपरी चिंचवड शहरही मागे नाही. शहरातील बाजारपेठांमध्ये भगवे ध्वज, टोपी, मूर्ती, झेंडे, पताका, भगवी वस्त्रे विक्रीसाठी आलेले आहेत. अनेकजण ते खरेदी करण्यासाठी गर्दी करत आहेत. तसेच भगव्या रंगांचे आकाशकंदील विक्रीसाठी आलेले आहेत. सोमवारी (दि. २२) हा सोहळा दिवाळी सारखा साजरा करण्याचे अनेकांचे नियोजन आहे. त्यामुळे वस्तू साहित्य खरेदीसाठी गर्दी होत आहे.

बाजारात प्रभू श्रीराम, सीता, लक्ष्मण आणि हनुमान यांची मूर्ती आणि प्रतिमा विक्रीसाठी आलेल्या आहेत. त्यांच्या किमती आकार आणि उंचीनुसार असून नागरिक खरेदी करत आहेत. भगव्या रंगातील श्रीरामाची प्रतिमा असलेले आकाशकंदील यांच्या किमती २०० रुपयांपासून पुढे आहेत. तर, भगवे ध्वज ५० रुपयांपासून पुढे आहेत. टोपी, स्किटरही विक्रीसाठी आहेत.

मंदिरांमध्ये कार्यक्रम
पिंपरी चिंचवड शहरात चिंचवड, निगडी, रहाटणी, शाहूनगर आदी ठिकाणी श्रीराम मंदिर आहेत. मंदिरांवर विद्युत रोषणाई करण्यात आली आहे. मंदिरांमध्ये स्वच्छता करून आकर्षक सजावट करण्यात आली आहे. सोमवारी विविध कार्यक्रम होणार असल्याने येणाऱयांसाठी खास सुविधा करण्यात आली आहे. तसेच सोमवारी विविध कार्यक्रम होणार असून शहरातून शोभायात्रा काढण्यात येणार आहे. तसेच भजन, कीर्तन, व्याख्यान व महाप्रसादाचेही आयोजन करण्यात आले आहे. चिंचवड येथील श्री राम देवस्थानतर्फे मंदिर परिसरात शोभायात्रा काढण्यात येणार आहे. तसेच विविध कार्यक्रम व कारसेवकांचा सत्कार होणआर आहे. मोहननगर येथील श्रीराम मंदिरात प्रतिमा स्थापना, पूजन, श्रीराम स्तुती पठण, शोभायात्रा, पालखी सोहळा आयोजित केला आहे.