Pimpri Chinchwad News – पिंपळे गुरव येथील लक्ष्मी नगर, सातपुते रोड आणि ६० फूट रोड परिसरात मोठ्या प्रमाणात कचरा साचत असल्याने नागरिक त्रस्त झाले आहेत. हा परिसर वाहतूक आणि वर्दळीचा असूनही येथे कचऱ्याचे ढीग साचलेले दिसून येतात. त्यामुळे परिसरात दुर्गंधी पसरत असून नागरिकांच्या आरोग्याचा प्रश्न निर्माण झाला आहे.रस्त्यावर टाकलेला कचरा खाण्यासाठी जनावरे जमा होतात. यामुळे वाहतुकीला अधिकच अडचणी निर्माण होत आहेत. सायंकाळच्या वेळी या ठिकाणी डासांचे प्रमाणही वाढत असून नागरिकांना मोठा त्रास सहन करावा लागत आहे. या परिस्थितीकडे महापालिका प्रशासनाने तातडीने लक्ष देण्याची मागणी स्थानिक नागरिकांनी केली आहे. पिंपरी-चिंचवड शहरात ‘इंदोर पॅटर्न’च्या धर्तीवर कचरा व्यवस्थापन राबवण्यात आले असून स्मार्ट सिटी उपक्रमांतर्गत अनेक ठिकाणांहून कचराकुंड्या हटवण्यात आल्या आहेत. मात्र कचरा उचलण्यासाठी आवश्यक असलेले योग्य नियोजन करण्यात प्रशासन अपयशी ठरल्याची टीका नागरिकांकडून होत आहे. परिसरात कचऱ्याचे प्रमाण वाढत असून त्यासाठी आवश्यक यंत्रणा अपुरी पडत आहे. त्यामुळे दुर्गंधी व अस्वच्छतेमुळे नागरिकांना आरोग्याच्या समस्यांचा सामना करावा लागत आहे. कचरा उचलण्यासाठी वेळेचे योग्य नियोजन करून परिसर स्वच्छ ठेवण्याची मागणी नागरिकांनी केली आहे. सामाजिक कार्यकर्ते नितीन सोनवणे यांनी सांगितले की, “कचरा व्यवस्थापनासाठी प्रभावी यंत्रणा उभारून वेळेवर कचरा उचलला गेला, तरच शहर स्वच्छ राहील आणि नागरिकांना आरोग्याच्या समस्या निर्माण होणार नाहीत.”
