पिंपरी – पिंपरी-चिंचवड आणि मावळ तालुक्‍यातील हजारो महिला आणि तरुणी शिक्षण आणि नोकरीसाठी पुण्यात आणि पिंपरी-चिंचवडमध्ये येतात. या महिला आणि तरुणींसाठी रेल्‍वे लोकल हा सर्वाधिक स्‍वस्‍त पर्याय आहे. यामुळे हजारो महिलांना घरी आणि नोकरीवर जाण्यासाठी रेल्‍वे लोकल सर्वांत मुख्य आधार आहे.

परंतु पिंपरी-चिंचवड आणि मावळमधील काही रेल्‍वे स्‍थानकांवरील वातावरण महिलांसाठी सुरक्षित नसल्‍याच्‍या तक्रारी वाढत आहेत. मद्यपींचा वाढता वावर, टवाळखोर यामुळे असुरक्षिततेची भावना वाढत असून अशा स्‍थानकांवर पोलीस सुरक्षा वाढविण्याची मागणी जोर धरत आहे.

रात्री आठ वाजल्यानंतर उपनगरी रेल्वे स्थानकांवर पुरेशा प्रमाणात सुरक्षा कर्मचारी उपस्थित नसल्याने महिला प्रवाशांना असुरक्षिततेची भावना घेऊन प्रवास करावा लागत आहे. घोरावाडी, बेगडेवाडी आणि देहूरोड या स्थानकांवर रात्रीच्या वेळी पोलिसांची पुरेशी उपस्थिती नसल्याची तक्रार प्रवाशांकडून केली जात आहे.

तर पिंपरी रेल्‍वे स्‍थानक आणि स्‍थानक परिसरात मद्यपी आणि टवाळखोरांचा वावर अधिक आहे. परंतु पिंपरी रेल्‍वे स्‍थानकावर पोलिसांची गस्‍त असल्‍याने इतर स्‍थानकांच्‍या तुलनेत हे स्‍थानक थोडेसे सुरक्षित आहे. या स्थानकांवर महिला पोलिसांसह सुरक्षा कर्मचाऱ्यांची कायमस्वरूपी नियुक्ती करण्याची मागणी जोर धरत आहे.

पिंपरी-चिंचवड आणि परिसरातील अनेक महिला नोकरदार, विद्यार्थिनी तसेच कामानिमित्त प्रवास करणाऱ्या महिलांना रात्रीच्या वेळेत रेल्वेने प्रवास करावा लागतो. दिवसभर प्रवाशांची वर्दळ असलेल्या स्थानकांवर रात्री मात्र तुलनेने शांतता असते.

अशा वेळी स्थानकांवर पोलीस कर्मचारी किंवा महिला सुरक्षा कर्मचारी दिसत नसतील, तर महिलांच्या सुरक्षिततेचा प्रश्न अधिक गंभीर बनतो. लोकलमधून उतरून घरी जाण्यासाठी वाहनाची वाट पाहणाऱ्या महिलांना स्थानक परिसरात पुरेशी सुरक्षा मिळणे आवश्यक आहे.

सायंकाळी, रात्री अधिक सुरक्षेची गरज
रेल्वे स्थानकांवर महिलांची छेडछाड, विनयभंग किंवा इतर अनुचित प्रकार घडण्याची शक्यता लक्षात घेता केवळ सीसीटीव्ही कॅमेरे बसविणे पुरेसे ठरणार नाही. संशयास्पद हालचालींवर लक्ष ठेवण्यासाठी आणि एखादी अनुचित घटना घडल्यास तातडीने मदत करण्यासाठी प्रत्यक्ष सुरक्षा कर्मचारी उपस्थित असणे गरजेचे आहे.

मात्र, काही स्थानकांवर रात्रीच्या वेळी पोलिसांची उपस्थिती जाणवत नसल्याची प्रवाशांची तक्रार आहे. त्यातच तिकीट तपासनीसांची उपस्थितीही अनेकदा मर्यादित असल्याने स्थानकांवरील एकूण देखरेखीबाबत प्रश्न उपस्थित होत आहेत. रात्रीच्या वेळी प्रवाशांची संख्या कमी होत असली तरी सुरक्षा व्यवस्थेची गरज कमी होत नाही. उलट, कमी वर्दळ असलेल्या स्थानकांवर महिला प्रवाशांना अधिक सतर्क राहावे लागते.

गर्दीच्या वेळेत होणारी धक्काबुक्की, फलाटावरून रेल्वे रुळांवर पडण्याचा धोका तसेच अनुचित प्रकार घडल्यास मदत मिळण्यास होणारा विलंब, अशा अनेक बाबींकडे रेल्वे प्रशासनाने गांभीर्याने लक्ष देण्याची गरज आहे.

ही स्‍थानके सुनसान
घोरावडी, बेगडेवाडी आणि देहूरोड या स्थानकांवर रात्री आठ ते अकरा या वेळेत नेमके किती पोलिस कर्मचारी प्रत्येक्षात उपस्थित असतात, महिला पोलिसांची नियुक्ती आहे का, सुरक्षा कर्मचाऱ्यांची नियमित गस्त होते का, याबाबत स्पष्टता असणे आवश्यक आहे. स्थानकांवरील सीसीटीव्ही यंत्रणा कार्यरत आहे का आणि आपत्कालीन परिस्थितीत प्रवाशांना तातडीने मदत मिळण्यासाठी कोणती व्यवस्था उपलब्ध आहे, याचीही माहिती प्रवाशांना मिळणे गरजेचे आहे.

रेल्वे प्रशासन आणि रेल्वे पोलिसांनी या प्रश्नाकडे केवळ तक्रारीच्या स्वरूपात न पाहता महिला प्रवाशांच्या सुरक्षित प्रवासाच्या दृष्टीने ठोस उपाययोजना कराव्यात. रात्रीच्या वेळेत नियमित गस्त वाढविणे, प्रत्येक स्थानकावर पुरेसे सुरक्षा कर्मचारी उपलब्ध करून देणे, महिला पोलिसांची नियुक्ती करणे आणि आपत्कालीन मदत यंत्रणा अधिक सक्षम करणे आवश्यक आहे. महिलांना रात्रीच्या वेळीही कोणतीही भीती न बाळगता रेल्वेने प्रवास करता यावा, यासाठी प्रत्यक्ष सुरक्षा व्यवस्था उभी करण्याची मागणी प्रवाशांकडून होत आहे.

सीसीटीव्ही आहेत, पण सुरक्षा कर्मचारी किती?

रेल्वे स्थानकांवरील सीसीटीव्ही कॅमेरे हे सुरक्षेच्या दृष्टीने महत्त्वाचे असले तरी ते आपत्कालीन परिस्थितीत थेट मदत करू शकत नाहीत. एखाद्या महिलेसोबत अनुचित प्रकार घडल्यास किंवा प्रवाशाला अपघात झाल्यास तातडीने घटनास्थळी पोहोचणारा कर्मचारी असणे आवश्यक आहे. त्यामुळे घोरावडी, बेगडेवाडी आणि देहूरोड स्थानकांवर रात्री आठ ते अकरा या वेळेत किती कर्मचारी कार्यरत असतात, याची माहिती रेल्वे प्रशासनाने सार्वजनिक करावी, अशी मागणी होत आहे.

Mobile screen: मोबाईलच्या पडद्याआड हरवतंय बालपण; मुलांच्या हसऱ्या चेहऱ्यामागे वाढतोय मानसिक ताण!