पिंपरी – स्वच्छतेच्या बाबतीत देशपातळीवर पिंपरी-चिंचवडने अभिमानास्पद कामगिरी केली आहे. देशातील पहिल्या पाच स्वच्छ शहरांमध्ये पिंपरी-चिंचवडचा समावेश झाला असून, शहराच्या शिरपेचात मानाचा तुरा रोवला गेला आहे.

नवी मुंबई, पाचगणी, पिंपरी-चिंचवड, रत्नागिरी आणि विटा या शहरांनी स्वच्छतेच्या क्षेत्रात उल्लेखनीय कामगिरी नोंदवली आहे.

या यशाबद्दल ११ नोव्हेंबर रोजी नवी दिल्ली येथे राष्ट्रपती द्रौपदी मुर्मू यांच्या हस्ते पुरस्कार वितरण करण्यात येणार आहे. देशातील स्वच्छ शहरांच्या मानाच्या यादीत स्थान मिळविणाऱ्या पिंपरी-चिंचवडसाठी ही गौरवाची बाब ठरली आहे.

औद्योगिक शहर अशी ओळख असलेल्या पिंपरी-चिंचवडने स्वच्छतेच्या क्षेत्रातही आपली वेगळी ओळख निर्माण केली आहे. वाढती लोकसंख्या, विस्तारत चाललेली शहराची हद्द, औद्योगिक वसाहती, मोठ्या प्रमाणातील नागरी वस्ती आणि दररोज निर्माण होणारा कचरा अशा आव्हानांवर मात करत शहराने पहिल्या पाच स्वच्छ शहरांमध्ये स्थान मिळविले आहे.

ही कामगिरी एका दिवसातील स्वच्छता मोहिमेचा परिणाम नसून, नियमित कचरा संकलन, रस्ते व सार्वजनिक ठिकाणांची स्वच्छता, कचरा विलगीकरण आणि जनजागृती अशा विविध पातळ्यांवर सातत्याने झालेल्या प्रयत्नांचे फलित आहे.

या यशामध्ये महापालिकेच्या आरोग्य विभागाची भूमिका महत्त्वपूर्ण ठरली आहे. शहरातील दैनंदिन स्वच्छता व्यवस्था सुरळीत ठेवण्यापासून ते स्वच्छ सर्वेक्षणासाठी आवश्यक उपक्रम राबविण्यापर्यंत विभागाने विविध पातळ्यांवर काम केले.

घराघरांतून ओला आणि सुका कचरा स्वतंत्र संकलित करणे, कचऱ्याचे योग्य विलगीकरण, सार्वजनिक ठिकाणांची स्वच्छता, नागरिकांमध्ये जनजागृती आणि पुनर्वापराला प्रोत्साहन देणारी आर.आर.आर. केंद्रे अशा उपक्रमांवर भर देण्यात आला. या कामाचा सर्वांत महत्त्वाचा आधार म्हणजे प्रत्यक्ष मैदानात काम करणारे सफाई सेवक.

पहाटेपासून रस्ते, चौक, सार्वजनिक ठिकाणे आणि विविध नागरी भाग स्वच्छ ठेवण्यासाठी हे कर्मचारी मेहनत घेतात. कचरा संकलन, साफसफाई आणि स्वच्छतेच्या कामात सातत्य राखण्याची जबाबदारी ते पार पाडतात.

त्यांच्या कामावर देखरेख ठेवणारे सहायक आरोग्य अधिकारी, मुख्य आरोग्य निरीक्षक आणि आरोग्य निरीक्षक यांचे नियोजन व क्षेत्रीय पातळीवरील कामही या यशासाठी महत्त्वाचे ठरले आहे. या यशाबद्दल महापालिका आयुक्त डॉ. विजय सूर्यवंशी यांनी आरोग्य विभागाचे अधिकारी व कर्मचाऱ्यांचे कौतुक केले.

कचरा व्यवस्थापनापासून लोकसहभागापर्यंत
शहरातील स्वच्छता व्यवस्था अधिक प्रभावी करण्यासाठी कचरा संकलनाबरोबरच त्याचे योग्य व्यवस्थापन करण्यावर भर देण्यात आला.

नागरिकांनी घरातूनच ओला आणि सुका कचरा वेगळा द्यावा, सार्वजनिक ठिकाणी कचरा टाकू नये आणि पुनर्वापर करता येणाऱ्या वस्तूंचा योग्य वापर करावा, यासाठी जनजागृती करण्यात आली. गृहनिर्माण संस्था, स्वयंसेवी संस्था आणि नागरिकांनाही विविध स्वच्छता उपक्रमांमध्ये सहभागी करून घेण्यात आले.

११ नोव्हेंबरला दिल्लीत गौरव
देशातील पहिल्या पाच स्वच्छ शहरांमध्ये स्थान मिळविणाऱ्या पिंपरी-चिंचवडचा गौरव ११ नोव्हेंबर रोजी नवी दिल्ली येथे होणार आहे. राष्ट्रपती द्रौपदी मुर्मू यांच्या हस्ते पुरस्कार वितरण करण्यात येणार असल्याने शहराच्या या कामगिरीकडे राज्यासह देशाचे लक्ष लागले आहे.

नवी मुंबई, पाचगणी, रत्नागिरी आणि विटा या महाराष्ट्रातील अन्य शहरांचाही या यादीत समावेश झाल्याने राज्याच्या स्वच्छता क्षेत्रातील कामगिरीला विशेष महत्त्व प्राप्त झाले आहे.

‘शहर स्वच्छ ठेवण्यासाठी कचऱ्याचे योग्य विलगीकरण, नियमित कचरा संकलन आणि सार्वजनिक ठिकाणांची स्वच्छता या बाबी अत्यंत महत्त्वाच्या आहेत. आरोग्य विभागाकडून विविध जनजागृतीपर आणि नावीन्यपूर्ण उपक्रम राबवून नागरिकांचा सहभाग वाढविण्याचा प्रयत्न केला जात आहे.

सहायक आरोग्य अधिकारी, आरोग्य निरीक्षक, मुख्य आरोग्य निरीक्षक आणि सफाई सेवक यांच्या योगदानासोबतच नागरिकांचे सहकार्य यामुळेच स्वच्छतेच्या या अभियानाला व्यापक यश मिळत आहे.’ – डॉ. प्रदीप ठेंगल, उप आयुक्त.

दिल्ली वार्ता : राजकीय संघर्षाचा काळ