Pimpri Chinchwad Crime – स्‍टार बाजारच्‍या वेगवेगळ्या सुपरमार्टमधून तूप, काजू, बदाम अशा महागड्या वस्‍तुंची चोरी करणाऱ्या टोळीला वाकड पोलिसांनी अटक केली आहे. या टोळीत चार महिला आणि तीन पुरुष आहेत. पाेलिसांनी आरोपींकडून तब्‍बल ७ लाख 21 हजार रुपयांचा मुद्देमाल जप्त केला आहे. रविकांत देवानंद जाकरे (३२, जोगेश्वरी ईस्ट, मुंबई),

ब्रिजेश सिताराम मदेशिया (२७, जोगेश्वरी ईस्ट, मुंबई), ब्रिजेश बाळु यादव (३७, जोगेश्वरी वेस्ट, मुंबई), सोनम बाबु शेख (३७, जोगेश्वरी ईस्ट, मुंबई), सलमा शकिल शेख (७१, भोसरी, पुणे), सानिया बाबुमिया शेख (२०, जोगेश्वरी ईस्ट, मुंबई) आणि रूमा ब्रिजेश मदेशिया (वय २७, रा. जोगेश्वरी ईस्ट, मुंबई) कशी अटक केलेल्या आरोपींची नावे आहेत.

वाकड येथील दत्त मंदिर रोडवरील स्टार सुपरमार्केट मध्ये २९ ऑगस्ट रोजी आणि कलाटे वस्ती येथील स्टार बाजार सुपरमार्केट मध्ये १२ ऑगस्ट रोजी चोरी झाली. चोरट्यांनी सुपर मार्केट मधून ४२ हजार १०० रुपये किमतीचे गोवर्धन तूप, काजू, बदाम असे साहित्य चोरून नेले. याबाबत वाकड पोलीस ठाण्यात गुन्ह्याची नोंद करण्यात आली होती.

गुन्ह्याचे गांभीर्य लक्षात घेऊन वाकड पोलिसांच्या तपास पथकाने घटनास्थळासह परिसरातील सीसीटीव्ही फुटेजची पाहणी केली. तांत्रिक विश्लेषण केले. तपासादरम्यान गुन्ह्यात वापरलेली इनोवा कार मुंबईच्या दिशेने गेल्याची आणि पुन्हा पिंपरी चिंचवड परिसरात आल्याची माहिती पोलिसांना मिळाली. पोलिसांनी तातडीने जाळे रचून ताथवडे-वाकड परिसरातून संशयित इनोवा कार व एक ऑटो रिक्षा ताब्यात घेतली.

आरोपींची कसून चौकशी केली असता, त्यांनी पिंपरी आणि चिखली पोलीस ठाण्यांच्या हद्दीतील स्टार बाजारमध्येही अशाच प्रकारच्या चोऱ्या केल्याची कबुली दिली. याशिवाय काटे पिंपळे आणि वाघोली (केसनंद फाटा) येथील स्टार बाजारमधूनही काजू, बदाम आणि तुपाचे पाऊच चोरल्याचे उघडकीस आले आहे.