Devendra Fadnavis : फलटण येथील उपजिल्हा रुग्णालयातील डॅाक्टर तरुणी आत्महत्या प्रकरणामुळे राज्यात मोठी खळबळ उडाली आहे. या प्रकरणामुळे राज्यातील वातावरण ढवळून निघाले आहे. विरोधकांकडून सरकावर टीकेची झोड उठवली जात आहे. या मृत्यू प्रकरणात अनेक धक्कादायक खुलासे होत असून, भाजपच्या माजी खासदार आणि पीएचे नाव जोडले जात आहे. यामुळे प्रकरणाने वेगळे वळण घेतले आहे. तरुणीने तिच्या सुसाईट नोटमध्ये पोलीस अधिकारी गोपाळ बदने याच्यावर चार वेळा अत्याचार केल्याचा तर प्रशांत बनकरने मानसिक त्रास दिल्याचा गंभीर आरोप केला आहे. तसेच खासदारांच्या पीएकडून रुग्णालयात तपासणीसाठी येणाऱ्या आरोपींना फिटनेस सर्टिफिकेट देण्यासाठी दबाव आणला जात असल्याची तक्रार तरुणीने दिली होती. हे प्रकरण भाजपचे माजी खासदार रणजितसिंह नाईक निंबाळकर यांच्याशी जोडले जात आहे. हेही वाचा : Satara News : महाबळेश्वरमध्ये मेटगुताड गण महत्त्वाचा मुख्यमंत्र्यांचे आश्वासन आता या प्रकरणावर मुख्यमंत्री देवेंद्र फडणवीस यांची प्रतिक्रिया समोर आली आहे. याप्रकरणात योग्य ती कारवाई होईल, असे आश्वासन मुख्यमंत्री देवेंद्र फडणवीस यांनी दिले आहे. फलटणच्या रुग्णालयातील डॉक्टर तरुणीच्या आत्महत्या प्रकरणाला विरोधी पक्षांकडून जाणीवपूर्वक राजकीय रंग देण्याचा प्रयत्न होत आहे. हे करणं योग्य नाही. मी एवढे स्पष्टपणे सांगतो की, प्रत्यक्ष किंवा अप्रत्यक्ष यामध्ये कोणीही यामध्ये सहभागी आहे, असा पुरावा मिळाला तर आम्ही त्याला सोडणार नाही. पण या घटनेचे राजकारण करु नका, असे फडणवीस यांनी स्पष्ट केले आहे. माजी खासदारांनी आरोप फेटाळले या प्रकरणात रणजित सिंह नाईक निंबाळकर यांच्यावर करण्यात आलेले आरोप त्यांनी फेटाळले आहेत. मृत डॉक्टर तरुणीने सुसाईड नोटमध्ये जो खुलासा केला आहे, त्यामध्ये खासदार महोदयांचा फोन आला, अशी माहिती समोर आली होती. यावर बोलताना रणजित सिंह नाईक निंबाळकर यांनी दैनंदिन जीवनात मी अनेकांना फोन करतो. पण महिला डॉक्टरने तिच्या चॅटमध्ये असं कुठेही म्हटलेलं नाही की, खासदारांनी मला दम दिला. रणजितसिंह नाईक निंबाळकरांनी दम दिला किंवा खासदारांच्या पीएने दम दिला. खासदारांनी केवळ माहिती घेतली एवढंच या तरुणीने आपल्या पत्रात म्हटले आहे, असे ते म्हणाले. मी कधीही त्या मुलीला फोन केला नाही, मला असा कोणताही फोन झाल्याचे आठवत नाही, असेही रणजित सिंह नाईक निंबाळकरांनी सांगितले. या प्रकरणातील एका आरोपीला प्रशांत बनकरला पोलिसांनी पुण्यातील त्याच्या मित्राच्या फार्महाऊसवरून ताब्यात घेतले आहे, आरोपीला पोलिस कोठडी सुनावण्यात आली आहे. तर पोलीस अधिकारी गोपाळ बदने पोलिसांना गुंगारा देत होता, अखेर तो स्वतः काल रात्री उशिरा फलटण पोलिसांना शरण आला आहे. हेही वाचा : रशियाचा पुन्हा एकदा युक्रेनवर मोठा हल्ला; 4 जणांचा मृत्यू
