Sweden : स्वीडन  (Sweden)  सरकारने केलेली इंधन कर कपात १ जुलैपासून लागू झाल्यामुळे पेट्रोल आणि डिझेल भरणाऱ्यांसाठी ‘स्वीडन’ हा देश सध्या संपूर्ण नॉर्डिक (उत्तर युरोप) क्षेत्रात सर्वात स्वस्त केंद्र बनला आहे. स्वीडन सरकारने आगामी ३० सप्टेंबरपर्यंत पेट्रोल आणि डिझेलवरील करात प्रति लिटर ३ क्रोना इतकी मोठी तात्पुरती कपात केली आहे.

या निर्णयामुळे देशांतर्गत इंधनाचे दर कमालीचे खाली आले आहेत. त्यानुसार पेट्रोलचा दर प्रति लिटर १७.३९ क्रोनावरून थेट १४.३९ क्रोना, तर डिझेलचा दर १९.२९ क्रोनावरून थेट १६.२९ क्रोना झाला आहे.

स्वीडनने जरी आपले दर खाली आणले असले, तरी शेजारील इतर देशांमध्ये मात्र सध्या इंधनाच्या महागाईचा भडका उडालेला पाहायला मिळत आहे. स्वीडनचा शेजारी देश असलेल्या नॉर्वेमध्ये पेट्रोलचे दर सध्या संपूर्ण युरोपमध्ये सर्वात जास्त म्हणजे सुमारे २४ ते २५ नॉर्वेजियन क्रोन (स्वीडिश चलनात सुमारे २५-२६ क्रोना) प्रति लिटरवर पोहोचले आहेत. याचाच परिणाम म्हणून, सीमेवर राहणारे नॉर्वेचे नागरिक आता स्वस्त इंधन भरण्यासाठी मोठ्या संख्येने स्वीडनमध्ये गर्दी करत आहेत.  (Sweden)

याबरोबरीनेच इतर शेजारील देशांचा विचार केल्यास, फिनलंडमध्ये पेट्रोलचे दर स्वीडिश चलनात मोजल्यास प्रति लिटर सुमारे १९ ते २० क्रोना आहेत. तर डेन्मार्कमध्ये इंधनाचे दर १६ ते १७ डॅनिश क्रोन (स्वीडिश चलनात सुमारे २५-२६ क्रोना) प्रति लिटरच्या घरात आहेत.

थोडक्यात, जिथे शेजारील देशांतील लोकांना एक लिटर पेट्रोलसाठी २५ ते २६ स्वीडिश क्रोना मोजावे लागत आहेत, तिथे स्वीडनमध्ये ते अवघ्या १४ ते १६ क्रोनामध्ये उपलब्ध होत आहे. याच दरातील प्रचंड तफावतीमुळे सध्या स्वीडन हे नॉर्डिक क्षेत्रातील वाहनधारकांसाठी इंधन भरण्याची पहिली पसंती ठरत आहे.