प्रभात वृत्तसेवा पिंपरी – अवैध धंद्यांवर धडाकेबाज कारवाई करताना पिंपरी–चिंचवड पोलिसांनी कडक भूमिका घेतली असली, तरी शहरातील वाढत्या चोरी, घरफोड्या आणि जबरी चोरी या गुन्ह्यांची उकल करण्यात तपास यंत्रणा कमी पडत असल्याची भावना नागरिकांत निर्माण झाली आहे. ‘कारवाईत हिरो; पण तपासात झिरो’ अशी टीका होत असून, गुन्ह्यांच्या तपासाकडे अधिक लक्ष देण्याची मागणी पुढे येत आहे. राज्य पातळीवर सुरू असलेल्या ‘मिशन ऑल आऊट’ मोहिमेअंतर्गत पिंपरी–चिंचवड पोलिसांनी अवैध दारू, गुटखा, जुगार, शस्त्रसाठा आणि गॅस चोरी यासारख्या प्रकरणांवर मोठ्या प्रमाणात कारवाई केली आहे. लाखो रुपयांचा मुद्देमाल जप्त करून कारवाईचे हत्यार उपसण्यात पोलिसांना यश आले. मात्र, शहरात वाढणाऱ्या चोरी, घरफोड्या आणि साखळी ओढण्याच्या घटनांची उकल न झाल्याने तपास यंत्रणा प्रभावी ठरत नसल्याची भावना नागरिकांमध्ये व्यक्त होत आहे. शहरातील विविध पोलीस ठाण्यांमध्ये दररोज दुचाकी चोरीचे अनेक गुन्हे नोंदवले जात आहेत. त्यासोबत घरफोड्या, मोबाइल चोरी, रस्त्यातील लूटमार, सोनसाखळी चोरीचे गुन्हे वाढल्याचे दिसून येत आहे. अनेक प्रकरणांमध्ये आरोपी सीसीटीव्हीत स्पष्ट दिसत असतानाही उकल होत नसल्याने नागरिक निराश आहेत. गुन्ह्यांच्या तपासासाठी ठसेतज्ज्ञ, श्वानपथके, सीसीटीव्ही फुटेजचा आधार घेतला जात असला तरी काही मोजक्या प्रकरणांशिवाय अन्य गुन्ह्यांचा छडा लागत नाही, अशी टीका होत आहे. त्यामुळे स्थानिक पोलीस ठाण्यांच्या तपास शाखेसह गुन्हे शाखाही निष्प्रभ ठरत असल्याचा समज वाढू लागला आहे. परिणामी पोलीस यंत्रणेवरील विश्वास डळमळीत होत असल्याचेही नागरिकांचे म्हणणे आहे. मनुष्यबळ आणि बंदोबस्तात गुंतलेली यंत्रणा निवडणूक प्रक्रिया, मोर्चे, बंदोबस्त, विविध कार्यक्रम यामुळे शहर पोलिसांवर ताण वाढला आहे. अनेक पोलीस ठाण्यांत मनुष्यबळ कमी असल्याने गुन्ह्यांचा तपास मागे पडतो, अशी कबुली पोलीस वर्तुळातूनही दबक्या आवाजात दिली जाते. प्रलंबित गुन्ह्यांचा आढावा घेण्यासाठी होणाऱ्या क्राइम मिटिंगमध्येही अपेक्षित परिणाम दिसत नसल्याची चर्चा आहे. गुन्ह्यांच्या तपासाकडे कमी लक्ष? गुटखा, मटका, अवैध दारू, गोवंश तस्करी यांसारख्या अवैध धंद्यांवर कारवाई होत असली तरी या कारवायांमागील माहिती बहुधा टिप्स किंवा परस्पर वैरातूनच मिळते, अशीही चर्चा रंगते. नागरिकांचे म्हणणे आहे की, ज्या बारकाईने अवैध धंद्यांवर नजर ठेवली जाते, त्याच तीव्रतेने घरफोड्या आणि चोरींच्या तपासावर भर दिल्यास गुन्ह्यांचा प्रतिबंध होऊ शकतो. अनेक विशेष पथके सक्रिय, तरीही उकल कमी पिंपरी–चिंचवड पोलीस आयुक्तालयांतर्गत स्थानिक गुन्हे शाखा, डीबी (डिटेक्शन ब्रांच), खंडणी विरोधी पथक, वाहन चोरी विरोधी पथक अशी विशेष पथके सक्रिय असतानाही गुन्ह्यांची उकल अपेक्षेइतकी होत नसल्याने या पथकांवर प्रश्नचिन्ह उपस्थित होत आहे. कारवाईपुरती ख्याती नव्हे, तर तपासात परिणामकारकता हवी”. पोलिसांनी प्राधान्यक्रम बदलत गुन्ह्यांच्या तपासावर अधिक लक्ष दिल्यासच कायदा-सुव्यवस्थेवरील विश्वास दृढ होईल, अशी अपेक्षा शहरवासियांनी व्यक्त केली आहे. आकडे बोलतात… -अकरा महिन्यांतील गुन्ह्यांची आकडेवारी -गुन्ह्याचे स्वरूप दाखल उघड -घरफोडी २५५ १२३ -वाहन चोरी ८८२ ३४१
