PCMC News – शहरातील आरएमसी प्लांट व बांधकाम साहित्य पुरवठारांकडून नियमांची पायमल्ली होत असल्याचे समोर आले आहे. प्लांट परिसरामध्ये धूळ नियंत्रणासाठी दिलेल्या मार्गदर्शक सूचनांचे पालन केले जात नाही. त्यामुळे शहराच्या प्रदूषणामध्ये वाढ होत आहे. या प्रदूषणात कारणीभूत होत असलेल्या आरएमसी प्लांट चालकांवर कारवाई करण्याचा इशारा महापालिका प्रशासनाने दिला आहे. पिंपरी चिंचवड शहरातील वाढत्या वायू प्रदूषणावर नियंत्रण ठेवण्यासाठी महापालिकेच्या पर्यावरण विभागामार्फत विविध उपाययोजना राबविण्यात येत आहेत. शहरातील आरएमसी प्लांट, बांधकाम स्थळे तसेच बांधकाम साहित्य साठवणूक ठिकाणी धूळ व वायू प्रदूषण रोखण्यासाठी आवश्यक त्या उपाययोजना करणे बंधनकारक करण्यात आले आहे. महाराष्ट्र प्रदूषण नियंत्रण मंडळाच्या दिनांक १७ ऑक्टोबर २०२४ रोजीच्या परिपत्रकानुसार आरएमसी प्लांट तसेच बांधकाम स्थळांवर धूळ नियंत्रणासाठी ठरवून दिलेल्या मार्गदर्शक सूचनांचे पालन करणे आवश्यक आहे. मात्र काही ठिकाणी या सूचनांचे पालन होत नसल्याचे महापालिकेच्या निदर्शनास आले आहे. पिंपरी चिंचवड शहरातील वायू गुणवत्ता निर्देशांक मोजणी केंद्रांच्या नोंदीनुसार शहरातील हवेची गुणवत्ता सध्या मध्यम (AQI १०० ते १५०) या श्रेणीत असल्याचे दिसून येत आहे. या पार्श्वभूमीवर सर्व आरएमसी प्लांट धारक, बांधकाम व्यावसायिक तसेच बांधकाम साहित्य पुरवठादार यांनी धूळ व वायू प्रदूषण नियंत्रणासाठी आवश्यक उपाययोजना तात्काळ कराव्यात, असे आवाहन पिंपरी चिंचवड महापालिकेमार्फत करण्यात आले आहे. संबंधित आस्थापनांची महापालिकेच्या क्षेत्रीय कार्यालयामार्फत नियमित तपासणी करण्यात येणार असून नियमांचे उल्लंघन करणाऱ्या आस्थापनांवर कठोर कारवाई करण्यात येणार आहे. तसेच जोपर्यंत उपाययोजना करण्यात येत नाही तोपर्यंत आस्थापना बंद ठेवण्यात येणार आहेत. गरज भासल्यास संबंधित आस्थापना सील करण्याची कारवाई करण्यात येईल यासाठी सहकार्य करावे ,असे आवाहन पर्यावरण विभागाचे मुख्य अभियंता संजय कुलकर्णी यांनी दिला आहे.
