PCMC News – पिंपरी चिंचवड महापालिकेमार्फत शहरातील विविध रुग्णालयांमध्ये आरोग्य सेवा अधिक सक्षम करण्यासाठी मोठा निर्णय घेण्यात आला आहे. यापूर्वी एकूण २३० तज्ञ वैद्यकीय अधिकाऱ्यांची नियुक्ती करण्यात आली होती. त्यांची मुदत संपल्याने त्यांना मुदतवाढ देण्याचा निर्णय वैद्यकीय विभागाने घेतला आहे. त्याला स्थायी समितीने मान्यता दिली आहे. वैद्यकीय विभागाकडून मानधन कमी मिळत असल्याने बाहेरील डॉक्टर महापालिका रुग्णालयामध्ये काम करण्यासाठी तयार होत नाहीत. परिणामी, वैद्यकीय तज्ज्ञांची कमतरता असून गतवर्षी नियुक्ती केलेल्या वैद्यकीय तज्ज्ञांना मुदतवाढ देण्यात आली आहे. तर आणखी वैद्यकीय तज्ज्ञांच्या शोधात महापालिका प्रशासन आहे. महापालिकेच्या वायसीएम रुग्णालयासह नव्याने सुरू करण्यात आलेल्या जिजामाता, भोसरी, थेरगाव, तालेरा रुग्णालयांमध्ये तसेच यमुनानगर व सांगवी रुग्णालयांमध्ये विविध विभाग कार्यान्वित करण्यात आले आहेत. या रुग्णालयांमध्ये स्त्रीरोग, बालरोग, मेडिसिन, सर्जरी, अस्थिरोग, नेत्ररोग, कान-नाक-घसा, मानसोपचार, त्वचारोग, आयसीयू, एनआयसीयू व डायलेसिससारख्या अत्यावश्यक सेवा सुरू करण्यात आल्या आहेत. या विभागांचे कामकाज सुरळीत चालण्यासाठी महापालिकेच्या स्थायी समितीच्या मंजुरीनुसार ११ महिन्यांच्या करारावर तज्ञ वैद्यकीय अधिकाऱ्यांची नियुक्ती करण्यात आली होती. यामध्ये कन्सल्टंट, ज्युनियर कन्सल्टंट व हाऊसमन अशा पदांचा समावेश असून त्यांना अनुक्रमे सुमारे १.२५ लाख, १ लाख व ६० हजार रुपये इतके मानधन देण्यात येत आहे. तसेच नव्याने सुरू करण्यात आलेल्या २५० खाटांच्या तालेरा रुग्णालयासाठीही अतिरिक्त २७ तज्ञ वैद्यकीय अधिकाऱ्यांची नेमणूक करण्यात आली आहे. यामध्ये कन्सल्टंट व ज्युनियर कन्सल्टंट पदांचा समावेश आहे. दरम्यान, महापालिकेच्या रुग्णालयांमध्ये डीएनबी कोर्सही सुरू करण्यात आला आहे. त्यासाठी अनुभवी डॉक्टरांना डीएनबी शिक्षक म्हणून पदनाम देण्यात आले असून त्यांच्या वेतनातही वाढ करण्यात आली आहे. वायसीएम रुग्णालय कन्सल्टंटना सुमारे १ लाख ४० हजार तर ज्युनियर कन्सल्टंटना १ लाख १५ हजार रुपये मानधन देण्यात येत आहे. या नियुक्त्यांचा कालावधी फेब्रुवारी २०२६ पर्यंत होता. रुग्णालयांतील सेवा अखंड सुरू राहण्यासाठी आवश्यकतेनुसार पुढील कालावधी वाढविण्याचा निर्णय घेण्यात आला आहे. तसेच रिक्त पदांसाठी वेळोवेळी वॉक-इन इंटरव्ह्यूद्वारे पात्र उमेदवारांची निवड करण्यात येत आहे. आताही २ फेब्रुवारी २०२७ पर्यंत त्यांना मुदतवाढ देण्यात आली आहे. यामुळे शहरातील नागरिकांना अधिक दर्जेदार आणि तत्पर आरोग्य सेवा उपलब्ध होणार असल्याचा दावा वैद्यकीय विभागाने केला आहे. वैद्यकीय अधिकाऱ्यांनाही मुदतवाढ वैद्यकीय विभागांतर्गत विविध रुग्णालयांमध्ये तज्ञ वैद्यकीय अधिकाऱ्यांची नियुक्ती करण्याचा निर्णय घेतला आहे. यामध्ये थेरगाव, जिजामाता, भोसरी येथील नवीन रुग्णालये तसेच ह.भ.प. प्रभाकर मल्हारराव कुटे स्मृती रुग्णालय आणि यशवंतराव चव्हाण स्मृती रुग्णालयातील विविध विभागांचा समावेश आहे. रुग्णालयांमध्ये स्त्रीरोग, बालरोग, मेडिसिन, क्ष-किरण, ऑर्थोपेडिक, नेत्ररोग, न्यूरोसर्जरी, हृदयरोग, कान-नाक-घसा, पॅथॉलॉजी आणि सर्जरी अशा महत्त्वाच्या विभागांसाठी तज्ञ डॉक्टरांची आवश्यकता आहे. या पार्श्वभूमीवर विविध पदांवर तज्ञ वैद्यकीय अधिकाऱ्यांची नियुक्ती करण्यात आली होती. त्यांना दरमहा २० हजार रुपये मानधन देण्यात येत असून, त्यांची नियुक्ती ११ महिन्यांच्या कालावधीसाठी केली होती. यापूर्वी नियुक्त करण्यात आलेल्या डॉक्टरांच्या सेवांचा कालावधी १६ एप्रिल २०२५ रोजी संपत आहे. दरम्यान, काही तज्ञ डॉक्टर उपलब्ध नसल्याने रुग्णालयातील सेवा विस्कळीत होण्याची शक्यता निर्माण झाली होती. त्यामुळे सध्याच्या डॉक्टरांच्या सेवांना मुदतवाढ देणे तसेच नव्याने तज्ञांची नियुक्ती करणे आवश्यक होते. त्यासाठी नियुक्त वैद्यकीय अधिकाऱ्यांना एक वर्षाची मुदतवाढ देण्यात आली आहे. त्याला स्थायी समितीने मंजुरी दिली आहे. “महापालिका रुग्णालयांमध्ये कंत्राटी पद्धतीने ११ महिन्यांच्या कालावधीसाठी डॉक्टरांची नियुक्ती करण्यात येते. अत्यावश्यक सेवा तसेच वैद्यकीय सेवेत खंड पडू नये त्यासाठी या डॉक्टरांना मुदतवाढ देण्याचा निर्णय घेण्यात आला आहे.” – अभिषेक बारणे, सभापती, स्थायी समिती.
