PCMC News – पिंपरी चिंचवड महापालिकेत कंत्राटी पद्धतीने नगरसचिव पद भरण्यात आले आहे. कंत्राटी नगरसचिव उल्हास जगताप यांना वित्तीय अधिकार नसल्याने महापालिकेचे स्थायी समिती अध्यक्ष अभिषेक बारणे यांनी त्यांच्या नेमणुकीवर आक्षेप घेतला आहे. राज्य शासनाकडून त्या नियुक्तीबाबत मार्गदर्शन मिळत नाही, तोपर्यंत महापालिकेचे नगरसचिव मुकेश कोळप हे स्थायी समितीचे कामकाज बघतील, असा निर्णय त्यांनी घेतला आहे. तर दुसरीकडे कायदा विभागाच्या अभिप्रायासाठी प्रशासनाची धावपळ सुरू झाली आहे.

पिंपरी-चिंचवड महापालिकेच्या सर्वसाधारण सभेचे कामकाज व्यवस्थित चालावे म्हणून महापौर रवि लांडगे यांनी कंत्राटी पद्धतीने नगरसचिव भरण्याची मागणी केली होती. त्यानुसार, प्रशासनाने जाहिरात प्रसिद्ध करत अर्ज मागवले. या पदासाठी निवृत्त नगरसचिव व अतिरिक्त आयुक्त उल्हास जगताप यांचा एकमेव अर्ज आल्याने महासभेत त्यांची कंत्राटी नगरसचिव म्हणून नियुक्ती करण्यात आली. तर, महापालिकेचे नगरसचिव मुकेश कोळप यांची आयुक्तांकडून तडकाफडकी ग क्षेत्रीय अधिकारी म्हणून बदली करण्यात आली.

असे करताना कंत्राटी नगरसचिव जगताप यांच्याकडे कोणतेही वित्तीय अधिकार देण्यात आले नाहीत. ते अधिकार नगरसचिव कोळप यांच्याकडेच कायम ठेवण्यात आले. दरम्यान, विधानपरिषद स्थानिक स्वराज्य संस्थेच्या निवडणूक आचारसंहिता असल्याने त्या नियुक्तीबाबत कोणी आक्षेप घेतला नाही. आचारसंहिता उठल्याने बुधवारी (दि. १०) स्थायी समिती सभा झाली. समितीचे अध्यक्ष अभिषेक बारणे यांनी कंत्राटी नगरसचिव जगताप यांच्यावर आक्षेप घेतला. त्यांना वित्तीय अधिकार नाहीत. स्थायी समितीचे सर्व विषय हे आर्थिक विषयाशी संबंधित असतात.

त्यामुळे ते स्थायी समिती सभेचे कामकाज करू शकत नाहीत. आर्थिक विषयाच्या निर्णयावर सह्या करू शकत नाहीत. त्याप्रकरणी बारणे यांनी महापालिका प्रशासन तसेच, कायदा विभागाचा अभिप्राय मागवला. त्याबाबत कायदा विभागाकडे उत्तर नव्हते. त्यानंतर बारणे यांनी राज्य शासनाला पत्र पाठवले आहे. स्थायी समितीच्या सभेचे कामकाज कंत्राटी नगर सचिव घेऊ शकतात का, याबाबत मार्गदर्शन करण्याची विनंती त्यांनी केली आहे. राज्य शासनाचे उत्तर आल्यानंतर कंत्राटी नगर सचिवामार्फत स्थायी समिती सभेचे कामकाज घेऊ, असे त्यांनी स्पष्ट केले.

सर्वसाधारण सभेला कोण बसणार?
सोमवारी (दि. १५) महापालिकेची सर्वसाधारण सभा आहे. या सभेचे कामकाज कंत्राटी नगरसचिव उल्हास जगताप पाहणार की, महापालिकेचे नगरसचिव मुकेश कोळप पाहणार हा प्रश्‍न उपस्थित केला जात आहे. दरम्यान, महापौरांच्या आग्रहाखातर कंत्राटी नगरसचिव भरतीला स्थायी समितीचे अध्यक्ष अभिषेक बारणे यांचा विरोध असल्याचे या सगळ्या गोंधळावरून स्पष्ट होत आहे.

“नगरसचिव पदाबाबत कायदा विभागाकडे अभिप्राय मागवला आहे. विभागाचा अभिप्राय आल्यानंतर यावर निर्णय घेण्यात येईल.”
– मनोज लोणकर, सह आयुक्त.