PCMC News – शहरातील वाढत्या वायू प्रदूषणावर नियंत्रण आणण्यासाठी करण्यात येत असलेल्या उपाययोजनांचा सविस्तर आढावा घेण्यासाठी महापालिकेच्या मुख्य प्रशासकीय इमारतीतील दिवंगत माजी महापौर मधुकर पवळे सभागृहात अतिरिक्त आयुक्त तृप्ती सांडभोर यांच्या अध्यक्षतेखाली बैठक घेण्यात आली. महापालिकेतील विविध विभागांनी समन्वयाने काम करून प्रदूषण नियंत्रणाची गती वाढवावी तसेच प्रदूषणाशी संबंधित नियमावलीची व्यापक जनजागृती करण्यात यावी, असे स्पष्ट निर्देश या बैठकीत अतिरिक्त आयुक्त सांडभोर यांनी दिले. महापालिका मुख्य अभियंता संजय कुलकर्णी, आरोग्य कार्यकारी अधिकारी किरणकुमार मोरे, कार्यकारी अभियंता सोहन निकम, योगेश आल्हाट, सुर्यकांत मोहिते, उप अभियंता पंकज धेंडे, प्रीती गाडे, अशोक मोरे, संजय चव्हाण तसेच पर्यावरण विभाग, स्थापत्य विभाग, बांधकाम परवाना विभाग आणि आरोग्य विभागाचे अधिकारी व कर्मचारी उपस्थित होते. बैठकीत उपद्रव शोध पथकातील मनुष्यबळात वाढ करून शहरातील प्रत्येक बांधकाम प्रकल्प, धुळीचे प्रदूषण रेडी मिक्स काँक्रिट प्लांट आणि औद्योगिक परिसरांना अधिकाधिक भेट द्यावी, असे निर्देश देण्यात आले. संबंधित ठिकाणी ग्रेडेड रिस्पॉन्स ॲक्शन प्लॅन (ग्रॅप) मधील नियमांचे पालन होते का, याची तपासणी करून नियमभंग करणाऱ्यांवर त्वरित दंडात्मक कारवाई तसेच कठोर प्रशासकीय उपाययोजना करण्याच्या सूचना देण्यात आल्या. शहरभर तपासणी व दंडात्मक कारवाई फेब्रुवारी २०२५ ते फेब्रुवारी २०२६ या कालावधीत रस्त्यावर किंवा नदीकाठी कचरा टाकणे, सांडपाणी प्रक्रिया न करता नदीत सोडणे, कचरा जाळणे व प्लास्टिकचा गैरवापर, सार्वजनिक ठिकाणी घाण करणे, तसेच जैववैद्यकीय किंवा ई-कचऱ्याची अनियमित विल्हेवाट आणि बांधकाम राडारोडा टाकणे या विविध कारणांवरून महापालिकेने शहरभरातील एकूण ४ हजार ८५३ आस्थापनांवर कारवाई करण्यात आली असून २ कोटी ५९ लाख ६ हजार २०० रुपयांचा दंड वसूल करण्यात आला आहे. “शहरातील बांधकाम व औद्योगिक आस्थापनांनी ग्रॅप अंतर्गत सर्व नियमांचे शंभर टक्के पालन करणे अत्यावश्यक आहे. धूळ नियंत्रण, उत्सर्जन व्यवस्थापन आणि स्वच्छतेसंदर्भातील कोणतीही ढिलाई स्वीकारली जाणार नाही. महापालिका प्रदूषण नियंत्रणाबाबत कठोर भूमिका घेत असून नियमभंग करणाऱ्यांवर त्वरित कारवाई केली जाईल.” – तृप्ती सांडभोर, अतिरिक आयुक्त, पिंपरी चिंचवड महापालिका.
