PCMC News – पिंपरी चिंचवड शहरामध्ये मालमत्तांचे दोन विभाग करून मालमत्ताकर आकारणी करण्यात येणार होती. त्यासाठी भाजपाच्याच नगरसेवकांनी प्रस्ताव दिला होता. मात्र महासभेत भाजपमध्येच दोन गट पडले. काही नगरसेवकांनी या प्रस्तावाच्या विरोधात भूमिका घेतली. शहरातील मालमत्तांचे तीनऐवजी अ आणि ब असे दोन विभाग करून मालमत्ताकर दर निश्चित करण्याचा विषयाला भाजपाचेच राहुल कलाटे आणि शहराध्यक्ष शत्रुघ्न काटे यांनीच विरोध केला. आपलेच सदस्य विरोध करत असल्याने तासभराच्या चर्चेनंतर नाइलास्तव सत्ताधारी भाजपाला आपलाच तो प्रस्ताव मागे घेण्याची नामुष्की ओढवली. उत्पन्न वाढीसाठी स्थायी समितीचे अध्यक्ष अभिषेक बारणे यांनी शहराचे तीनऐवजी दोन विभाग करण्याचा प्रस्ताव स्थायी समितीमार्फत सर्वसाधारण सभेसमोर आणला होता. त्याबाबत अभिषेक बारणे म्हणाले की, सध्या शहरात मालत्ताकर दरात असमतोल आहे. या माध्यमातून कर रचना एक सारखी करण्यात येत आहे. मालमत्ताकर दरात कोणतीही वाढ नाही. केवळ नवीन बांधकामांना नवीन दर लागू होणार आहेत. तो जास्त नाही. मात्र, या विषयाला भाजपच्याच नगरसेवकांनी विरोध केला. राहुल कलाटे म्हणाले, शहराचे दोन विभाग केल्याने निवासी मालमत्ता तसेच, व्यापारी गाळ्याचा मालमत्ताकर दुप्पटीने वाढणार आहे. हा मालमत्ताधारकांवरील अन्याय आहे. हा पक्षाचा विषय असला तरी, मी नागरिकांच्या हितासाठी विरोध करत आहे. भाजप. रेड झोन जागेच्या बदल्यात महापालिका नुकसान भरपाई म्हणून टीडीआर निम्म्या दराने देते. त्या भागांतील मालमत्ताकर ही निम्मा घ्यावा, अशी सूचना शहर सुधारणा समितीचे सभापती संजय काटे यांनी मांडली. विकास साने यांनी गोठ्यांवर कर न लावण्याची मागणी केली. नगरसेविका सुलभा उबाळे म्हणाल्या की, महापालिका तोट्यात असल्याने कर संकलनाच्या माध्यमातून उत्पन्न वाढीकडे लक्ष देण्यात येत आहे. तब्बल ५ हजार ५०० कोटी रुपयांचे दायित्व आहे. या माध्यमातून नवीन बांधकामांना नवीन दर लावला जात आहे. जे नव्याने शहरात राहण्यास येतात, त्यांना कर भरावा लागणार आहे. तो विषय मंजुरीसाठी शासनाकडे पाठवावा. संदीप वाघेरे म्हणाले की, मोकळ्या जागेचा कर घेतला जातो. नवीन बांधकामांकडून कर घेण्यापूर्वी सुविधा दिल्या जाव्यात. विषय तहकूब करा. किवळे भागात मालमत्ताकरात ५० टक्के सवलत मिळत नाही. नगरसेवकांना विश्वासात घेत नाही? दरम्यान, प्रस्तावाच्या विरोधाच चर्चा गेल्याचे लक्षात येताच सत्तारुढ पक्षनेते प्रशांत शितोळे यांनी हा विषय तहकूब करण्याची सूचना केली. मात्र, यामुळे भाजपच्याच नगरसेवकांनी मांडलेल्या प्रस्तावाला भाजपमधीलच नगरसेवकांनी विरोध केल्याने पक्षाती गट-तट समोर आले आहेत. तर प्रस्ताव करतेवेळी अनेक नगरसेवकांना विश्वासात घेत नसल्याचेही समोर आले आहे. केवळ नव्या बांधकामांना नवा दर लागू होणार सन २०२६-२७ या नव्या वर्षापासून अ आणि ब विभागानुसार नवीन मालमत्ताकर दर लागू केला जाणार आहे. साधारण १ हजार रुपयांची वाढ नव्या निवासी मालमत्तेस लागणार आहे. त्यातून महापालिकेच्या उत्पन्नात सुमारे ५० कोटी रुपयांची वाढ अपेक्षित आहे, असे खुलासा करसंकलन विभागाचे उपायुक्त सचिन पवार यांनी सभागृहात केला.
