PCMC Mayor – पिंपरी चिंचवड महापालिकेच्या सार्वत्रिक निवडणुकीपूर्वी भाजपच्या वतीने अनेकांचा प्रवेश करून घेत त्यांना विविध पदे देण्याचे आश्वासन देण्यात आले. त्यामुळे नवखे व ज्येष्ठ यांच्यासह आता निष्ठावंत आणि आयाराम असा अंतर्गत कलह सुरू झाला आहे. त्याची प्रचिती महापौर निवडीसाठी अर्ज दाखल करतेवेळी आली. यावेळी उपमहापौर पदासाठी नाव जाहीर झालेले शितल शिंदे यांनी त्रागा करत महापालिका भवन सोडले. तर शहराध्यक्ष शत्रुघ्न काटे यांनीही अनुपस्थित राहत आपली नाराजी नोंदवली. त्यामुळे आगामी काळात पदांवरून हा संघर्ष आणखी तीव्र होणार असल्याचे समोर आले आहे.महापौर पदासाठी आरक्षण खुले झाल्यानंतर अनेकांनी महापौर पदासाठी फिल्डिंग लावण्यास सुरूवात केली होती. शहराध्यक्ष शत्रुघ्न काटे यांनी पक्षाची धुरा सांभाळत निवडणुकीत चांगली कामगिरी केली. तब्बल ८५ नगरसेवक निवडून आणले. यामध्ये पक्ष काम करत असताना शहराध्यक्ष म्हणून त्यांना श्रेय दिले जाते. त्यामुळे महापौर पदावर त्यांनी देखील दावा केला होता. महापौर पदाबाबत निर्णय घेण्यासाठी घडामोडी सुरू असतानाच पक्षनेत्याची निवड करण्यात आली. तब्बल २५ वर्ष राष्ट्रवादी काँग्रेसमध्ये राहिलेल्या आणि महापालिका निवडणुकीच्या तोंडावर भाजपमध्ये दाखल झालेल्या प्रशांत शितोळे यांच्या नावावर पक्षनेते पदासाठी शिक्कामोर्तब होत गटनोंदणी करण्यात आली. दुसऱ्या पक्षातून आलेल्या व्यक्तीला पद दिल्याने भाजपमधील निष्ठावंत नाराज झाले होते. मात्र, महापौर पदी पक्षातील निष्ठावंताची वर्णी लागेल अशी आशा बाकी नगरसेवकांना होती. शितल शिंदे – रवी लांडगे आता महापौर पदासाठी रवी लांडगे यांची निवड झाली आहे. ते मूळचे भाजपचे असले तरी विधानसभा निवडणुकीत त्यांनी महाविकास आघाडीची साथ देत भोसरीतील भाजप आमदार महेश लांडगे यांना आव्हान दिले होते. असे असतानाही त्यांना महापौर पदावर संधी देण्यात आली आहे.यामुळे पक्षातच अंतर्गत कलह सुरू झाला आहे. महापौर पदासाठी इच्छुक असलेले शहराध्यक्ष शत्रुघ्न काटे हे रवी लांडगे यांचा अर्ज दाखल करण्यासाठी उपस्थित राहिले नाही. आमदार शंकर जगताप शहराध्यक्ष असताना तसेच विधानसभा निवडणुकीवेळी देखील काटे यांनी त्यांच्या मार्गात काटे टाकण्याचा प्रयत्न केला होता. त्यामुळे त्यांना या मानाच्या पदापासून दूर ठेवले असल्याची चर्चा राजकीय वर्तुळात रंगू लागली आहे. तर दुसरीकडे निष्ठावंत म्हणून ओळख असलेले शितल शिंदे यांनी महापौर पदाएवजी उपमहापौर पदासाठी नाव आल्याचे समजताच नाराजी व्यक्त करत महापालिकेतून काढता पाय घेतला. परिणामी, भाजप अंतर्गत कलह चव्हाट्यावर आला आहे. “यापूर्वी देखील अर्ज भरण्याच्या दिवशी उपमहापौर पदासाठी नाव बदलण्याच्या अनेक घटना घडल्या आहेत. त्यांना उपमहापौर पद नको असून ते दुसऱ्या पदासाठी इच्छुक आहेत. पक्ष त्यांच्या मागणीचा सन्मानजनक विचार करेल. आमच्या पक्षात आता कोणीही नाराज नाही, जे अनुपस्थित आहेत ते देखील नाराज नाही. त्यांना दुसरे काम असल्याने ते उपस्थित नाहीत. याचा अर्थ असा नाही की ते नाराज आहेत. पद एक असते आणि इच्छुक अनेक असतात. मात्र, पक्ष सगळ्यांना न्याय देण्याचा प्रयत्न करत आहे.” – प्रशांत शितोळे, पक्षनेते, भाजपा.
